ԱՄՆ պաշտպանության նախարար Ռոբերտ Գեյթսը տեսակետ է հայտնել, որ Իրանի դեմ ռազմական հարվածը միայն կհամախմբի իրանական ժողովրդին և Թեհրանին կհամոզի միջուկային զենքի տիրանալու անհրաժեշտության մեջ,- հաղորդել է Reuters գործակալությունը: Պենտագոնի ղեկավարի կարծիքով` կարևոր է օգտագործել ուրիշ, ոչ ռազմական մեթոդներ, որպեսզի կանխվի Իրանում միջուկային զենքի հայտնվելը: ԱՄՆ պաշտպանության նախարարը համոզված է, որ Իրանի դեմ ռազմարշավը միայն կհետաձգի, բայց չի կանխի Իսլամական Հանրապետության՝ միջուկային տերություն դառնալը: Գեյթսը նաև այն կարծիքին է, որ Իրանի դեմ միջազգային պատժամիջոցները կարող են լուրջ տարաձայնությունների պատճառ դառնալ երկրի նախագահ Մահմուդ Ահմադինեժադի և գերագույն ղեկավար այաթոլլա Ալի Խամենեիի միջև: «Մենք նույնիսկ որոշ վկայություններ ունենք այն մասին, որ Խամենեին սկսում է հետաքրքրվել, թե Ահմադինեժադն իրեն չի՞ ստում արդյոք տնտեսության նկատմամբ պատամիջոցների ազդեցության հարցում, ինչպես նաև՝ արդյո՞ք ինքը ամենաթարմ տեղեկատվությունն է ստանում իրական տնտեսական խնդիրների մասին»,- ասված է նախարարի մեկնաբանություններում:
Նախօրյակին Իրանի արտգործնախարարության պաշտոնական ներկայացուցիչ Ռամին Մեհմանպարաստը հայտարարել է, որ միջազգային միջնորդների «վեցյակի» հետ Իրանի բանակցությունների թեմատիկայի և վայրի շուրջ խորհրդակցությունները շարունակվում են: «Մենք համաձայնեցրել ենք բանակցությունների վերսկսման ամսաթիվը: Առայժմ համաձայնեցված չեն դրանց անցկացման վայրը և այն թեմաները, որ քննարկվելու են բանակցություններում: Համաձայնության հասնելուն պես մենք իսկույն կհայտարարենք այդ մասին»,- ասել է դիվանագետը:
