ՀՀ տնտեսական զարգացման եւ ներդրումների նախարարության շուկայի վերահսկողության տեսչական մարմինը նախորդ տարի ամենաշատ խախտումներն արձանագրել է ԱԳԼՃԿ-ների, խաղալիքների և կոսմետիկայի շուկաներում: «Արմենպրես»-ի հետ զրույցում այս մասին ասել է տեսչական մարմնի ղեկավարի տեղակալ Արթուր Մկրտչյանը
«Մենք վերահսկում ենք 33 ոլորտ: Ստուգումներ ենք անցկացնում ԱԳԼՃԿ-ներում, բենզինի շուկայում, սինթետիկ ներկերի, օծանելիքի, կոսմետիկայի արտադրանքներում: Օրինակ՝ 2017-ին ԱԳԼՃԿ-ներում կատարված ստուգումների արդյունքում բոլոր տնտեսվարող սուբյեկտների մոտ հայտնաբերվել են խախտումներ՝ կապված ճնշման և այլ հարցերի հետ»,-ասաց Մկրտչյանը:
Մնացած ոլորտներում հիմնական պահանջները վերաբերում են համապատասխանության գնահատմանը, սերտիֆիկատի առկայությանը, մակնշմանը: «Համատարած նույն թերություններն են: Առավել քիչ խախտումներ եղել են խեցեգործական արտադրությունում, վերգետնյա ապակիների արտադրությունում»,-նշեց Մկրտչյանն ու հավելեց, որ ուսումնասիրությունը կատարում են տարեկան մեկ անգամ, եթե տնտեսվարող սուբյեկտը ռիսկային է, եթե ոչ՝ 5 կամ 3 տարին մեկ:
