Հայաստանում հատուկ կացության կարգավիճակ շնորհելու կամ նման կարգավիճակի շնորհումը մերժելու լիազորությունը կտրվի հանրապետության վարչապետին: Ազգային ժողովի պետական-իրավական և մարդու իրավունքների պաշտպանության հարցերի մշտական հանձնաժողովը դրական եզրակացություն տվեց «Օտարերկրացիների մասին» Հայաստանի Հանրապետության օրենքում փոփոխություններ կատարելու մասին օրենքի նախագծին: Նախագիծը հանձնաժողովի անդամների քննարկմանը ներկայացրեց ՀՀ ոստիկանության պետի տեղակալ Վարդան Եղիազարյանը:
«Օրենքում փոփոխություններ կատարելու անհրաժեշտությունը պայմանավորված է այն Սահմանադրությանը համապատասխանեցնելու հրամայականով: Մասնավորապես, ներկայումս «Օտարերկրացիների մասին» ՀՀ օրենքի 18-րդ հոդվածի 5-րդ մասի համաձայն՝ հատուկ կացության կարգավիճակ տալու կամ մերժելու որոշում կայացնում է ՀՀ նախագահը։ ՀՀ Սահմանադրության մեջ 2015թ. կատարված փոփոխությունների արդյունքում հստակ սահմանվել են ՀՀ նախագահի լիազորությունները և 123-րդ հոդվածի 4-րդ մասում ամրագրվել է, որ Հանրապետության նախագահն իր գործառույթներն իրականացնում է Սահմանադրությամբ սահմանված լիազորությունների միջոցով: ՀՀ սահմանադրությամբ Նախագահին հատուկ կացության կարգավիճակ տրամադրելու լիազորություն չի վերապահվել, ուստի «Օտարերկրացիների մասին» գործող օրենքը Սահմանադրությանը համապաստասխանեցնելու նպատակով նախապատրաստվել է համապատասխան փոփոխություններ կատարելու օրինագիծ, որով նախատեսվում է հատուկ կացության կարգավիճակ շնորհելու լիազորությունը վերապահել ՀՀ վարչապետին»,- «Արմենպրես»-ի հաղորդմամբ, մանրամասնեց Վարդան Եղիազարյանը:
Նա հավելեց, որ առաջարկվող փոփոխություններով օրենքից կհանվի հատուկ կացության կարգավիճակ տալու կամ մերժելու որոշումը բողոքարկելու արգելքը: Եղիազարյանն ընդգծեց, որ օրենքն ուժի մեջ կմտնի ՀՀ նորընտիր նախագահի կողմից լիազորությունները ստանձնելու պահից: