«Վրաստանի օրինակը հնարավոր է մեզ համար «վարակիչ» դառնա, եթե մենք էլ Վրաստանի նման ամբողջական բարեփոխումներ անենք՝ սկսած ոստիկանական համակարգից, և քաղաքացին զգա, որ ինքն ուզում է ապրել այս երկրում․ գաղափարապես ամեն ինչ էլ կարելի անել, եթե դու ունես կամք, նպատակասլացություն՝ ինչ-որ բան իրոք փոխելու։
Վրաստանում ծփում են այդ տեսակ հանցագործություն կատարողները, բայց մեզ մոտ, բարեբախտաբար, ոչ։ Ըստ այդմ՝ մեզ մոտ կարող է ոչ թե առանձին հոդվածի կարիք լինի, այլ մենք ուղղակի հասկանանք, որ նման բաները մեր հասարակությանը վնասում են և, երբ արդեն կրթական, առողջապահական, սոցիալական, տնտեսական և այլ ոլորտներն այնքան կզարգանան, կբարեփոխվեն, որ քաղաքացին կհասկանա, որ լավագույնն է ապրել Հայաստանում, ապա այդ ժամանակ արդեն կարելի է ՔՕ-ի հոդվածներում պատիժը խստացնող դրույթներ ավելացնել և ծանրացնող հանգամանքներով մի քանի տարի ավել դատել, այսինքն՝ պատիժը կլինի առավել ծանր, սակայն նորից շեշտում եմ՝ դա միայն օրենքները փոխելով չի լինում»,- «Առաջին լրատվական»-ի հետ զրույցում նշեց «Սոցիալական արդարություն» ՀԿ նախագահ, քրեական արդարադատության հոգեբան Արշակ Գասպարյանը։
Նշենք, որ Վրաստանի կառավարությունը նախապատրաստել է օրենսդրական փոփոխությունների փաթեթ, որը խստացնում է պատասխանատվությունն «օրենքով գողերի» համար: «Գողական աշխարհի» հետ համագործակցությունը կարող է պատժվել մինչև ութ տարով ազատազրկման, իսկ «օրենքով գողերին» սպառնում է մինչև տասը տարվա ազատազրկում: Քրեական պատիժ է նախատեսվում նաև այն քաղաքացիների համար, ովքեր տարբեր հարցերով կդիմեն «օրենքով գողերին»: Վրաստանի վարչապետ Գեորգի Կվիրիկաշվիլին հայտարարել է, որ այս օրենսդրական փաթեթով մտադիր են բարձրացնել երկրի անվտանգության մակարդակը և, պաշտպանության օրենսդրական մեխանիզմներ ստեղծել հասարակության համար:
Որքանո՞վ է հնարավոր Վրաստանի այս փորձը, այս քայլը կիրառել Հայաստանում․ Արշակ Գասպարյանի խոսքերով՝ պետք է բարենպաստ միջավայր ստեղծել, որպեսզի այս կամ այն անձը ցանկություն չունենա դառնալու «օրենքով գող» և ընդհանրապես հանցագործություն կատարող անձ։
«Մինչև մեր պաշտոնյաները, տարբեր օղակներում որոշում կայացնողները չհասկանան և չորոշեն, որ հասարակությունը և համայնքը պիտի լինի անվտանգ՝ թե հոգեբանական, թե ֆիզիկական տեսակետից, ապա որևէ օրենքի փոփոխություն որևէ բանի չի բերելու․ քանի դեռ օրենքը կիրառվում է ցանկությամբ, կիրառվում է ընտրողաբար, ապա ինչ հոդված ուզում եք ավելացրեք՝ արդյունք չի ունենալու»,- ընդգծեց մեր զրուցակիցը։
Մանրամասները՝ տեսանյութում։