Կրեմլի սիրված «հաճախորդներից» մեկը` ռուսաստանցի տխրահռչակ քաղաքագետ Սերգեյ Կուրղինյանը երեկ հարցազրույց է տվել vestikavkaza.ru լրատվական-վերլուծական կայքին` հանդես գալով «սենսացիոն» բացահայտումներով: Սա այն դեպքն է, երբ Կուրղինյանը ձգտել է հնարավորինս անհեթեթ մտքեր արտահայտել` Կրեմլին հաճոյանալու, Պուտինի Սառը պատերազմի կոնցեպտի մեջ խցկվելու նպատակով:
Կուրղինյանը խոսել է երեսունամյա վաղեմության իրադարձությունների` 1988-ի փետրվարին Սումգայիթում տեղի ունեցած հայկական կոտորածների մասին: Ինքահռչակ քաղաքագետը պնդում է, որ Սումգայիթի ջարդերը կազմակերպել են ոչ թե ադրբեջանցիները, այլ` միջազգային կազմակերպությունների կողմից վարձված կողմնակի մարդիկ` հայ-ադրբեջանական կառավարելի հակամարտություն հրահրելու, իր իսկ ձևակերպմամբ` դեմոկրատական և լիբերալ միֆեր տարածելու նպատակով: Կուրղինյանն ակնհայտորեն գտնվում է Պուտինի վերջին ելույթի, այսպես ասած, «դոզայի» տակ, կամ` ավելի հավանական է, ուղղակի կատարում է կրեմլյան շրջանակների քարոզչական պատվերը:
Դաշնային ժողովի առջև ունեցած ծրագրային ելույթում Պուտինն, առանց այլևայլության, Արևմուտքը և հատկապես` ԱՄՆ-ը հռչակեց Ռուսաստանի թիվ մեկ «թշնամի»: Այս օրերին Ռուսաստանում մոլեգնում է աննախադեպ քարոզչություն Արևմուտքի, նրա արժեքների դեմ, այդ տրամաբանությամբ «խմբագրվում» է նույնիսկ պատմությունը` հարմարեցվելով պուտինյան «թեզերին»: Կուրղինյանի ելույթն այս շարքից է և ակնհայտորեն բացահայտում է պուտինյան Ռուսաստանի դեմքը, եթե նույնիսկ հայկական ազգանուն կրող պալատական խոսնակը չունի ֆորմալ որևէ կարգավիճակ:
Կուրղինյանի արածն անբարոյական է, առաջին հերթին, մասնագիտական էթիկայի տեսանկյունից, որովհետև նույնիսկ ամենակեղտոտ պատվերները պրոֆեսիոնալները կատարում են մասնագիտական նորմերի շրջանակում: Կուրղինյանն ոտնձգություն է կատարել պատմության, ճշմարտության, Սումգայիթի անմեղ զոհերի հիշատակի, մեծ հաշվով` մեր համազգային շարժման ու նրա լուսավոր նպատակների դեմ: Լակոնիկ տեսանյութը բացահայտում է, թե որքան հեռու կարող է հասնել ռուսական օֆիցիոզ քարոզչության ցինիզմը, մյուս կողմից` ինչքան կարող են նվաստանալ, ուրանալ իրենց արմատները Ռուսաստանի հայկական «էլիտայի» որոշ ներկայացուցիչներ` ռուսական արքունիքին քծնելու նպատակով:
Սերգեյ Կուրղինյանը, Անդրանիկ Միհրանյանը, մյուսները պարբերաբար հանդես են գալիս հակահայկական հայտարարություններով, ծաղրում են հայկական պետականությունը, մեր քաղաքական գործիչներին, ապա Երևանում արժանանում են պետական բարձր ընդունելության: Եթե Հայաստանի իշխանությունները մի փոքր արժանապատվություն, պետական մտածողություն ունենային, նման մարդիկ Հայաստանում կհայտարարվեն` որպես «անցանկալի անձ»: Եթե նման բան տեղի չի ունենում, ապա Հայաստանի իշխանության ներկայացուցիչները նույնանում են կուրղինյանների, միհրանյանների հետ` բարոյապես ոչնչացնելով մեր պետության հիմքերը: