Իրանի նախագահ Մահմուդ Ահմադինեժադի կարծիքով՝ ԼՂՀ հակամարտության լուծումը հնարավոր է բանակցությունների, արդարության և փոխադարձ հարգանքի առկայության պայմաններում։
«Տարածաշրջանի երկրները պետք է ապրեն խաղաղ ու համերաշխ։ Մենք հարևաններ ենք և մեր հարևանությունը ժխտել չենք կարող։ Դա ամրագրված է աշխարhագրորեն և պատմությամբ։ Եթե մենք փորձենք մեր խնդիրները լուծել արդար և համերաշխ, բոլոր խնդիրներին էլ լուծումներ կգտնվեն։ ԼՂ հակամարտության լուծումը նույնպես հնարավոր է բանակցությունների, արդարության և փոխադարձ հարգանքի առկայության պայմաններում»,- Lider հեռուստաընկերությանը տված հարցազրույցում ասել է Ահմադինեժադը` փոխանցում է Trend գործակալությունը։
Ըստ նրա՝ տարածաշրջանում հակամարտության առկայությունը վնասում է բոլորին։
«Դա երկու կողմերի հարստությունների, ժամանակի կորստի, նյարդային լարվածության առաջացման պատճառ է, ինչպես նաև խոչընդոտում է առաջընթացին։ Մենք բազմիցս հայտարարել ենք, որ Իրանը պատրաստ է աջակցել հակամարտության կարգավորմանը»,- ասել է Իրանի նախագահը։
Իրանի նախագահը այսօր ժամանել է Ադրբեջան, որտեղ կանցկացվեն երկու երկրների ղեկավարների հանդիպումներ։ Նա նաև կմասնակցի կասպյան պետությունների ղեկավարների գագաթնաժողովին։
