Լևոն Տեր-Պետրոսյանը «բուրժուադեմոկրատական հեղափոխություն» տերմինն առաջին անգամ օգտագործել է ոչ թե 2014-ի աշնանը, երբ այդպես էր կոչում իր և օլիգարխ Գագիկ Ծառուկյանի սկսած գործընթացը, այլ` 2008-ի փետրվարի 27-ին: Ազատության հրապարակում հավաքված բազմահազարանոց լսարանի առջև առաջին նախագահը հայտարարեց, թե իրենց արածը «դասական բուրժուադեմոկրատական հեղափոխություն է, որի էությունը տնտեսության ու տնտեսվարողների ազատությունն է ֆեոդալիզմի ճիրաններից»։ Փաստն այն է, որ ոչ 2008-ին և ոչ էլ` 2014-ին, ժողովուրդը այդպես էլ չկարողացավ վայելել բուրժուադեմոկրատական հեղափոխության պտուղները: Փետրվարի 27-ին ակտիվ էր նաև Սերժ Սարգսյանն, ով նախորդ օրվա ձախողված հանրահավաքից հետո փորձեց իր շուրջ քաղաքական կոնսոլիդացիայի իմիտացիա ստեղծել: Պատահական չէ, որ դեռևս վարչապետի կարգավիճակով խորհրդարան եկած Սերժ Սարգսյանն այս անգամ ԱԺ ամբիոնից համագործակցության առաջարկ արեց նախագահական ընտրապայքարի իր մրցակիցներին:
«Խնդրում եմ բոլորին, ով պատրաստ է համագործակցության, արձագանքել իշխանությունների կոչին, և այն ժամանակ այդ ամենը կտեղափոխվի գործնական դաշտ»,-խորհրդարանում ասել է Սերժ Սարգսյանը` թերևս հասկացնելով, որ պատրաստ է անգամ կոալիցիոն կառավարության ձևավորմանն` ընդդիմության մասնակցությամբ:
Երբ Սերժ Սարգսյանը խորհրդարանում հնչեցնում էր այս հայտարարությունն, արդեն պարզ էր, որ Լևոն Տեր-Պետրոսյանը մերժել է, նույնիսկ հեգնել է այն: Այսինքն, Սերժ Սարգսյանն մտադրվել էր կոալիցիա ձևավորել` ըստ էության, Տեր-Պետրոսյանի դեմ: Հայտնի է նաև, որ այդ օրերին Սերժ Սարգսյանն ակտիվ բանակցությունների մեջ էր Արթուր Բաղդասարյանի և ՀՅԴ-ի ղեկավարության հետ, սակայն նույնիսկ նրանք չէին շտապում հրապարակավ զորակցել Սարգսյանին` սպասելով դրամատիկ զարգացումների հանգուցալուծմանը: Սերժ Սարգսյանի կոչին փետրվարի 27-ին դրական արձագանքեց միայն Արտաշես Գեղամյանը, ում տարիներ առաջ ՀՀԿ առաջնորդը հրապարակավ նվաստացրել էր` անվանելով «դհոլ»:
Փաստորեն` Արտաշես Գեղամյանը դարձավ Սերժ Սարգսյանի ձախորդ օրերի ընկերը` դրա դիմաց հետագայում, ըստ ամենայնի, ցկյանս արժանանալով պատգամավորական մանդատի: Մյուս կողմից` նախագահական ընտրություններում Գեղամյանն այնքան աննշան ձայն էր ստացել, որ նրան դժվար էր անգամ կրտսեր դաշնակից համարելը: Փետրվարի 27-ին շարունակվեցին խուզարկություններն ու ճնշումները Տեր-Պետրոսյանի աջակիցների նկատմամբ։ Տեր-Պետրոսյանի կողմնակիցներն Ազատության հրապարակում «բացահայտեցին» ԱԱԾ երեք աշխատակիցների, ինչին հետևեցին այդ գերատեսչության կոշտ հայտարարությունն և ընդդիմության ներկայացուցիչների նոր ձերբակալությունները: