«Շիրակի պետական համալսարանի ռեկտոր Սահակ Մինասյանը՝ վայելելով ԿԳ նախարար Լևոն Մկրտչյանի հովանավորությունը, փորձում է հաշվեհարդար տեսնել իմ և Հովհաննես Խորիկյանի նկատմամբ»,- բարձրաձայնում է քաղաքագետ, ՇՊՀ դասախոս Գագիկ Համբարյանը։
«Գիտխորհրդի նիստ է հրավիրել փետրվարի 23-ին և քննարկել է Էթիկայի հանձնաժողով ձևավորելու հարցը, որը պետք է քննի մեր գործունեությունը սոցիալական ցանցերում: Եվ արդեն նախնական ես գիտեմ՝ այդ 5 հոգանոց հանձնաժողովն ինչ եզրակացություն է տալու: Նախ, այդ հանձնաժողովի անդամների մեծ մասին ես չեմ բարևում: Շատ հետաքրքիր է, որ այդ հանձնաժողովն է ձևավորվել։ Իբրև թե մենք վարկաբեկում ենք Շիրակի պետական համալսարանը՝ այն դեպքում, երբ բոլոր հրապարակումները վերաբերում են կոնկրետ Սահակ Մինասյան ռեկտորին։ Մենք որևէ ցանկություն ու նպատակ չունենք վարկաբեկել այն բուհը, որտեղ սովորել և աշխատում ենք արդեն մոտ 15 տարի»,-«Առաջին լրատվական»-ին փոխանցեց Համբարյանը։
Համբարյանն առաջարկում է ռեկտորին՝ իրեն դատի տալ ու հանգամանքները պարզվեն դատարանում։ «Ես ամեն ինչ փաստերով ու լուսանկարներով ներկայացնում եմ, այսպիսի աբսուրս բան ես չեմ տեսել։ Օրինակ՝ պարոն Մինասյանը էթիկայի հանձնաժողով չձևավորեց, երբ 2016-ի սեպտեմբերի վերջերին իրեն պատկանող ռեստորանում քեֆ-ուրախություն էր կազմակերպել ու մի քանի դասախոսներ՝ բազմաթիվ ուսանողների ներկայությամբ տուրուդմփոց էին արել, սեռական բնույթի հայհոյանքներով։ Էթիկայի հանձնաժողով չի ձևավորվել համալսարանում բոլորովին վերջերս տեղի ունեցած ուսանողների խայտառակ ծեծկռտուքի ժամանակ, երբ պրոռեկտորը հանգիստ կանգնած նայում էր»,-ասաց Համբարյանը։
Քաղաքագետը նշում է՝ Սահակ Մինասյանի ամենամոտ մարդիկ այսօր արդեն բուհում շշուկներ են տարածում, որ էթիկայի հանձնաժողով ստեղծելու գաղափարը մշակվել է ԿԳ նախարար Լևոն Մկրտչյանի կողմից։
«Հենց ինքն է հեղինակը և ինքն է դաբրոն տվել, որպեսզի Սահակ Մինասյանը փորձի փակել մեր բերանը։ Պարոն Մինասյանն ուղղակի հիսթերիայի մեջ է ընկնում, երբ ես ֆեյբուքյան գրառումներ եմ անում»,- եզրափակեց նա։
