Հայաստանում, Ադրբեջանում և Ռուսաստանում ընտրական գործընթացների ավարտից և իշխանության վերարտադրությունից հետո կարող է հնարավորություն առաջանալ ղարաբաղյան հիմնախնդրի բանակցված կարգավորման համար, կամ էլ ընդհակառակը՝ կարող են վերսկսվել ռազմական գործողությունները: «Առաջին լրատվական»-ի հետ զրույցում նման կարծիք հայտնեց Ադրբեջանում Միացյալ Նահանգների նախկին դեսպան, Ջորջ Մեյսոն համալսարանի հրավիրյալ պատվավոր պրոֆեսոր Ռիչարդ Կոզլարիչը:
Ամերիկացի վերլուծաբանը դժվարանում է ասել՝ ինչո՞ւ փոխվեց ընտրությունների օրը Ադրբեջանում, բայց նշում է չորս հնարավոր պատճառ:
«Պաշտոնական այն բացատրությունը, թե ընտրություններն ավելի ուշ անցկացվելու դեպքում կխանգարեին այլ միջոցառումներին, ինձ չի համոզում: Իմ կարծիքով՝ կարող է լինել չորս պատճառ: Առաջինը՝ Ադրբեջանի նախագահական ընտրությունները ժամանակով համապատասխանեցնել Ռուսաստանի ընտրությունների և Հայաստանում տեղի ունենալիք ընտրական գործընթացների հետ: Երկրորդը՝ տնտեսական խնդիրները և բանկային ճգնաժամը շարունակում են խորանալ, և վաղաժամ ընտրությունները թույլ կտան ավելի ուշ ընդունել տնտեսական բարդ որոշումներ՝ ներառյալ բարեփոխումները բանկային ոլորտում և հնարավոր նոր դեվալվացիան: Երրորդը՝ վաղաժամ ընտրությունները հնարավորություն կտան համաձայնության հասնելու իշխանության ներսում միմյանց դեմ պայքարող խմբավորումների հետ: Եվ վերջապես չորրորդ պատճառը կարող են լինել Լեռնային Ղարաբաղի շուրջ զարգացումները: Հայաստանում, Ադրբեջանում և Ռուսաստանում իշխանության վերահաստատումից հետո կարող է հնարավորություն ստեղծվել հիմնախնդրի բանակցված կարգավորման համար: Իհարկե, շատ լավ կլինի, եթե դա տեղի ունենա: Կամ էլ ընդհակառակը՝ զինված հակամարտության վերսկսման վտանգ կարող է առաջանալ»:
Մեկնաբանելով Ադրբեջանի նախագահի վերջին հայտարարությունը, թե «Երևանը, Զանգեզուրը ադրբեջանցիների պատմական տարածքներն են», և այդ տարածքները վերադարձնելն իրենց ստրատեգիական նպատակն է, Ռիչարդ Կոզլարիչն ասաց, որ այդ հայտարարությունը նոր չէ, անօգուտ է և անհասկանալի սպասվող նախագահական ընտրությունների համատեքստում:
«Նախագահ Ալիևն ուզում է փայլեցնել իր ազգայնական վկայականն ընտրությունների առաջ: Բայց նման հայտարարություններն ինձ լավատեսություն չեն ներշնչում ղարաբաղյան հարցի շուրջ դիվանագիտական գործընթացի և խնդիրը խաղաղ ճանապարհով լուծելու առումով: Նույն տրամաբանությամբ, ես հավասարապես օգտակար չեմ համարում Հայաստանի կողմից Ադրբեջանի տարածքները օկուպացման մեջ պահելը: Ես մտահոգված եմ, որ մենք ապրում ենք շատ վտանգավոր ժամանակներում, երբ զինված հակամարտության վերսկսման վտանգը Հայաստանի և Ադրբեջանի միջև գնալով մեծանում է»,- նշեց Ռիչարդ Կոզլարիչը՝ որպես վերջաբան առաջարկելով կարդալ ԱՄՆ Ազգային հետախուզության տնօրեն Քոութսի հեղինակած «Համաշխարհային սպառնալիքների գնահատման» 2018 թ. զեկույցը, որում ամերիկյան հետախուզական համայնքն արտահայտել է իր մտահոգությունը հայ-ադրբեջանական պատերազմի վերսկսման վտանգի վերաբերյալ: