Երուսաղեմի Տիրոջ գերեզմանի տաճարը երեկ, ժամը 12։00-ից, փակվել է՝ ի նշան բողոքի հարկեր գանձելու քաղաքային իշխանությունների ծրագրերի դեմ։ Երուսաղեմի հայոց պատրիարքության դիվանապետ Կորյուն վարդապետ Բաղդասարյանն «Առաջին լրատվական»-ի հետ զրույցում նշեց, որ բողոքի գործողություններն ուղղված են ոչ միայն հարկային քաղաքականությանը, այլև Կնեսետում շրջանառվող մի օրինագծի, որով պետությանը իրավունք է տրվելու բռնագրավել եկեղեցապատկան այն բոլոր կալվածքները, որոնք հետայսու կվարձակալվեն անհատ ձեռներեցների կամ պետության կողմից չվավերացված կազմակերպությունների կողմից։
Եկեղեցու դռները այս պահին էլ շարունակում են փակ մնալ, պահանջը հստակ է՝ քաղաքապետարանը չի կարող եկեղեցիներից և վանքերից հարկեր գանձել, դա դեմ է սուրբ երկրում վարվող այն քաղաքականությանը, որով դարեր շարունակ եկեղեցիները և վանքերը ազատված են եղել հարկեր վճարելուց։
«Այս օրինագիծը բացարձակապես անընդունելի է, եկեղեցիները պետք է ազատ լինեն տնօրինելու իրենց պատկանող կալվածքները, վարձակալելու՝ անկախ նրանից, թե դրանք ամենահարմար, ամենալավ կամ նույնիսկ անհատներ են, կամ պետության կողմից չճանաչված ընկերություններ»,- հավելեց հայր Կորյունը։
Երուսաղեմի քաղաքային իշխանությունը իր քայլերը հիմնավորում է հետևյալ կերպ՝ քաղաքապետարանի բյուջեում մեծ ճեղքված կա։ Այդ ճեղքվածքը փակելու համար քաղաքապետարանն ամիսներ առաջ դիմել է ֆինանսների նախարարությանը՝ հավելյալ գումարներ ստանալու, և մերժվել է ֆինանսների նախարարության կողմից։ Հիմա, Հայր Կորյունի խոսքով, այդ պարտքերը փակելու համար փորձում է եկեղեցիներից և վանքերից հարկեր գանձել, ինչը անընդունելի է։
Նա նաև նշեց, որ երեք հոգևոր պետերը շատ վճռորոշ են, և եկեղեցին կմնա փակ այնքան ժամանակ, մինչև պահանջները չբավարարվեն։
Հայր Կորյունի խոսքով՝ Կնեսետում երեկ նախատեսված օրինագծի քննարկումը հետաձգել են մեկ շաբաթով, բայց դա, անշուշտ, հոգևոր պետերին չի բավարարում, քանի որ նրանք պահանջում են ոչ թե քննարկման հետաձգում, այլ որ ընդհանրապես նման նախագիծը դուրս գա քննարկումից. «Քաղաքապետը հայտարարել է, որ իբր «եկեղեցիները և վանքերը միշտ ազատված են լինելու հարկերից, և մենք չենք պահանջում եկեղեցիներից և վանքերից հարկեր վճարել, այլ ասել է, որ եկեղեցապատկան շահութաբեր կալվածքներից»: Ասեմ, որ եկեղեցապատկան շահութաբեր կալվածքներն արդեն այդ հարկերը վճարում են, իրենց քաղաքականությունը ուղղակի եկեղեցիներից և վանքերից հարկեր գանձելն է, որին մենք դեմ ենք»,-ասաց նա։
Թրամփի՝ Երուսաղեմն Իսրայելի մայրաքաղաք ճանաչելու որոշումից հետո առկա լարվածությունը, նրա խոսքով, բավականին թուլացել է, կյանքը սովորական ընթացքով գնում է. «Մենք մեր առաքելությունները և պարտականություններն ենք կատարում սուրբ երկրում որպես պատրիարքարան, որպես նվիրապետական աթոռ: Կարծում ենք՝ արդեն եղած քաղաքական և պետական բացասական արձագանք կա այդ որոշման դեմ, և դա իր ազդեցությունը կունենա։ Համաշխարհային մակարդակով բացասական արձագանքը կունենա իր ազդեցությունը, և կպահպանվի այն եղած ստատուս քվոն, որ կա տասնամյակներ շարունակ»,- ասաց Հայր Կորյունը։
Երուսաղեմի հայոց պատրիարքությունը, որպես հայ եկեղեցու նվիրապետական աթոռներից մեկը, հետևում է, թե ինչ է կատարվում Պոլսո պատրիարքությունում։ Հայր Կորյունը նշեց նաև, որ հույս ունեն՝ հոգևոր սրբազան հայրերը իմաստությամբ և խորությամբ հնարավորինս լուծում կտան խնդրին, և մոտ ապագայում պատրիարքական ընտրություն կհայտարարվի։