ԱՄՆ Տիեզերական ուսումնասիրությունների ինստիտուտի գիտնականները պարզել են, որ ջուրը տարածված է Լուսնի ամբողջ մակերևույթով, ոչ թե սահմանափակվում է բևեռային շրջաններով: Այս մասին հայտնում է NASA-ն՝ վկայակոչելով Nature Geoscience-ում հրապարակված ուսումնասիրությունը:
Գիտնականներն այսպիսի եզրակացության են եկել՝ վերլուծելով ուղեծրային երկու զոնդերի տվյալները: NASA-ում կարծում են, որ այս արդյունքները կօգնեն հասկանալ՝ արդյոք կարելի է Լուսնի վրայի ջուրն օգտագործել որպես ռեսուրս: Եթե այն հեշտ հասանելի է, գաղութարարները կարող են այն վերցնել որպես ըմպելի, նաև դրանից թթվածին անջատել:
Նշվում է, որ ջուրն ամրակցված է Լուսնի մակերևույթին, դրա առկայությունը կախված չէ լուսնային հանքատեսակի կազմությունից: