ԱՄՆ նախագահ Դոնալդ Թրամփը դատապարտել է Ռուսաստանի, Իրանի, Բաշար Ասադի կառավարության գործողությունները Սիրիայում՝ դրանք անվանելով «ամոթ»: DW-ի հաղորդմամբ՝ այս մասին նա հայտարարել է փետրվարի 23-ին Ավստրալիայի վարչապետ Մալքոլմ Թերնբուլի հետ համատեղ մամլո ասուլիսի ժամանակ:
«Ռուսաստանի, Իրանի և Սիրիայի արածն ամոթ է հումանիտար առումով: Այն, ինչ այս 3 երկրներն անում են մարդկանց հետ վերջերս, ամոթ է»,- ասել է Թրամը:
Նա նշել է, որ ԱՄՆ-ը Սիրիայում է գտնվոմ բացառապես ԴԱԻՇ-ի դեմ պայքարի համար:
«Մենք այնտեղ ենք մեկ պատճառով՝ ԴԱԻՇ-ից ազատվելու և տուն վերադառնալու համար»,- ասել է ԱՄՆ նախագահը:
Ավելի վաղ տեղեկություններ էին հայտնվել, որ սիրիական կառավարական և ռուսական ավիացիայի զանգվածային ռմբակոծությունների հետևանքով Արևելյան Ղութայի շրջանում ավելի քան 400 մարդ է զոհվել։
