Թենիսիստուհի Սերենա Ուիլյամսը CNN-ի համար սյունակում պատմել է ծննդաբերության ծանր հետևանքների մասին։ Թրոմբոէմբոլիայի և հեմատոմայի պատճառով մայրության առաջին 6 շաբաթներին մարզուհին գամված է եղել ակնողնուն։
«Ես գրեթե մահացել էի դստերս՝ Օլիմպիային լույս աշխարհ բերելուց հետո։ Ամեն դեպքում, ես ինձ հաջողակ եմ համարում»,-գրել է Ուիլյամսը։
Հղիությունը հարթ է ընթացել, իսկ դստերը լույս աշխարհ է բերել հրատապ կեսարյան հատման ճանապարհով, քանի որ երեխայի սրտի զարկերը նվազել են կծկումների ժամանակ։
Ծննդաբերությանը հաջորդել են անորոշության 6 օրեր։ Թենիսիստուհու մոտ առաջացել է թոքի զարկերակի թրոմբոէմբոլիա։ 2011 թվականին նա արդեն բախվել էր այդ խնդրին։ Սաստիկ հազի հետևանքով բացվել է վերքը, որը մնացել էր կեսարյան հատումից հետո։ Սերենային վերադարձրել են վիրահատարան։ Նրա որովայնի խոռոչում հեմատոմա է հայտնաբերվել։
Իր սյունակում Սերենան երախտագիտություն է հայտնել բժիշկներին պրոֆեսիոնալիզմի համար։ «Եթե նրանց պրոֆեսիոնալ խնամքը չլիներ, այսօր այստեղ չէի լինի»,-գրել է նա։
Հիշեցնենք, որ Ուիլյամսի և Reddit-ի համահիմնադիր Ալեքսիս Օհանյանի դուստրը ծնվել է 2017 թվականի սեպտեմբերի 1-ին։ Երեխայի ծնվելուց հետո զույգը նոյեմբերին ամուսնացել է։