Բիրմինգեմի թագավորական դատարանը դատապարտել է Քեմբրիջի 29–ամյա շրջանավարտ Մեթյու Ֆալդերին, ով տեղի համալսարանի դոկտորանտ է, թեկնածուական թեզ է գրում գեոֆիզիկայից, ում մամուլը անվանել է «Միացյալ Թագավորության պատմության մեջ ամենավատ» բռնացողն ու պեդոֆիլը, 32 տարի ազատազրկման։
Այս մասին փետրվարի 20-ին գրում է բրիտանական The Guardian թերթը։
Ֆալդերը սոցցանցերում գտել է դեռահասների, ինչպես նաև երիտասարդ տղաների ու աղջիկների, և ստիպել է նրանց ստորացուցիչ գործողություններ կատարել. մերկ վիճակով շան կեր ուտել, շրթներկով մարմնի վրա գրել «ես պոռնիկ եմ ու խոզ» և այլն, ինչից հետո դրել է դրանց տեսագրությունները «սև համացանցում»։ Նա նաև բռնաբարությունների, սպանությունների և մանկական պոռնոյի տեսարաններ է տեղադրել։
Պեդոֆիլի զոհերը եղել են պրոբլեմատիկ դեռահասները՝ անորեքսիայով կամ ընկճախտով տառապող աղջիկներ, ում նա խոստանում էր վճարել նվաստացումների համար։
Gumtree կայքէջում հանցագործի հրապարակած գովազդին ընդհանուր առմամբ երեք հարյուր մարդ է արձագանքել։ Այն բանից հետո, երբ նրանք համաձայնում էին համագործակցել, Ֆալդերը նրանց շանտաժի էր ենթարկում, իսկ նրա պահանջները գնալով ավելի դաժան և նվաստացուցիչ էին դառնում։
Ֆալդերն օգտագործել է էլեկտրոնային փոստի անանուն հասցեներ և Tor ծրագրային ապահովումը, որը թաքցնում էր նրա կոորդինատները։ Տվյալ գործի հետաքննությանը մասնակցել են Հետաքննությունների դաշնային բյուրոյի աշխատակիցները, ինչպես նաև Իսրայելի, Սլովենիայի, Ավստրալիայի և Նոր Զելանդիայի իրավապահ մարմինները։ Ֆալդերն ընդունել է մեղադրանքի 137 կետերը. ութ տարվա ընթացքում նրա զոհերն են դարձել 48 մարդ, որոնցից երեքը ինքնասպանության փորձ են կատարել։