Ֆուտբոլի Հայաստանի ազգային հավաքականի բոլոր ժամանակների լավագույն հարձակվող Յուրա Մովսիսյանը տևական ժամանակ խաղից դուրս վիճակում է: Արդեն մեկ տարի է՝ խոսակցություններ են շրջանառվում հայ հարձակվողի՝ ամերիկյան «Ռեալ Սոլթ Լեյքը» լքելու մասին, սակայն Մովսիսյանի տրանսֆերն այդպես էլ տեղի չի ունենում: Մոտ մեկ ամիս առաջ տեղեկություն եղավ, որ Մովսիսյանն այլևս չի մարզվում «Ռեալ Սոլթ Լեյքի» հետ: Ավելին, ակումբի կայքի առկա հրապարակման համաձայն, Մովսիսյանը ամենևին երջանիկ չէ թիմում և պատրաստ է հեռանալ: Ավելի վաղ Մովսիսյանը հայտարարել էր, որ չի պատրաստվում նստել «Սոլթ Լեյքի» պահեստայինների նստարանին, և աշխատանքներ են տարվում այլ թիմ տեղափոխվելու համար:
Մովսիսյանի շուրջ ծագած խնդրին անդրադարձել էր նաև «Ռեալ Սոլթ Լեյքի» գլխավոր մարզիչ Մայք Պետկեն: «Մովսիսյանը բարձրակարգ ֆուտբոլիստ է, բայց ինչ-ինչ պատճառներով նրա խաղը չի ստացվում մեր թիմում: Մենք փորձում ենք գտնել լուծում, որը լավագույնը կլինի ինչպես Յուրայի, այնպես էլ ակումբի համար: Այո, Մովսիսյանի ծառայություններով հետաքրքրված են այլ թիմեր, բայց պետք է կայացվի այնպիսի որոշում, որից ոչ ոք չտուժի: «Ռեալ Սոլթ Լեյքը» պատրաստ է բանակցել Մովսիսյանի տրանսֆերի վերաբերյալ»,- ասել էր Պետկեն:
Նշենք, որ Մովսիսյանը 30 տարեկան է, և նրա երկար ժամանակ չխաղալը կարող է ծանր հետևանք ունենալ կարիերայի համար: Վերջերս մամուլում հրապարակումներ եղան, որ Մովսիսյանի ծառայությունով հետաքրքրված է Ղազախստանի «Ակտոբեն»: Վերջերս այս թիմի հետ պայմանագիր էր կնքել Հայաստանի ազգային հավաքականի կիսապաշտպան Մարկոս Պիզելին: Ղազախստանում հույս ունեին, որ Պիզելի-Մովսիսյան խաղային զույգը կմեծացնի հետաքրքրությունն առաջնության և մասնավորապես «Ակտոբեի» նկատմամբ: Խոսվում էր նաև, որ Մովսիսյանի ծառայություններով հետաքրքրված են նաև այլ ղազախական ակումբներ: Մովսիսյանն ու Պիզելին կարծես թե խաղընկերներ չդարձան:
Օրեր առաջ մամուլում տեղեկություն տարածվեց նաև, որ Յուրա Մովսիսյանը կարող է դառնալ Հայաստանի ազգային հավաքականի մեկ այլ կիսապաշտպանի՝ Արաս Օզբիլիսի խաղընկերը: Հիշեցնենք, որ վերջերս Օզբիլիսը վարձակալության հիմունքներով համալրել է Մոլդովայի բազմակի չեմպիոն Տիրասպոլի «Շերիֆի» շարքերը: Նշվում էր, որ «Շերիֆի» ղեկավարները շատ են ցանկանում Օզբիլիսի կողքին տեսնել Մովսիսյանին: Ու մինչ երկրպագուները քննարկում էին, թե հայ ֆուտբոլիստի համար որ ակումբ տեղափոխվելն է ավելի նպատակահարմար, Մովսիսյանի՝ «Սոլթ Լեյք Սիթին» լքելու հնարավոր տեղեկություններն ու խոսակցությունները կարծես թե սառան:
Հիշեցնենք, որ ամառային տրանսֆերային պատուհանի ընթացքում Մովսիսյանի ծառայություններով հետաքրքրված էին նաև մի շարք ամերիկյան և եվրոպական թիմեր: Մասնավորապես, հայ ֆուտբոլիստը մոտ էր վարձավճարով չեխական «Սլավիա» տեղափոխվելուն: Մովսիսյանի տրանսֆերը ցանկանում էին ձեռք բերել նաև Ռուսաստանի Պրեմիեր լիգան ներկայացնող թիմեր, մասնավորապես՝ «Լոկոմոտիվն» ու «Ռուբինը»:
«Առաջին լրատվական»-ի տեղեկություններով՝ Յուրա Մովսիսյանը «Ռեալ Սոլթ Լեյքից» չի կարողանում հեռանալ ֆինանսական խնդիրների պատճառով: Մասնավորապես, ամերիկյան ակումբը բավական մեծ գումար է պահանջում թե՛ Մովսիսյանի տրանսֆերի և թե՛ վարձակալության համար: Հիշենք, որ Մովսիսյանի տրանսֆերի համար «Ռեալ Սոլթ Լեյքը» Մոսկվայի «Սպարտակին» վճարել էր 3 միլիոն եվրո: Սա «Ռեալ Սոլթ Լեյքի» պես թիմի համար մեծ շռայլություն էր: Տեղափոխվելով «Ռեալ Սոլթ Լեյք»՝ Մովսիսյանը դարձել էր այս թիմի ամենաթանկ ֆուտբոլիստը:
Հայ հարձակվողն այս պահին ևս ամերիկյան թիմի ամենաթանկ ֆուտբոլիստն է: Ոչ պաշտոնական տեղեկության համաձայն՝ «Ռեալ Սոլթ Լեյքը» Մովսիսյանի տրանսֆերի համար պահանջում է 2 միլիոն եվրո: Նշենք, որ «Ռեալ Սոլթ Լեյքում» հանդես եկող ֆուտբոլիստների տրանսֆերային միջին արժեքը կազմում է մոտ 600 հազար եվրո: Բնական է, որ ամերիկյան թիմն ամեն ինչ կանի, որ հարձակվողին հրաժեշտ տա գոնե մինիմալ ֆինանսական կորստով: Այսօր Մովսիսյանը չի մարզվում, և «Ռեալ Սոլթ Լեյքի» մարզաշապիկը կրելու հեռանկար կարծես թե չկա: Շարունակելով մնալ խաղից դուրս վիճակում՝ Մովսիսյանը վերջնականապես կարող է հայտնվել փակուղային իրավիճակում: Կարծում ենք՝ պարզ է, որ ամառային տրանսֆերային պատուհանի ընթացքում այլ թիմերի կողմից Մովսիսյանի նկատմամբ հետաքրքրությունն էլ ավելի կնվազի: Բնականաբար, կնվազի նաև Մովսիսյանի տրանսֆերային արժեքը:
2016 թվականին Մովսիսյանը «Ռեալ Սոլթ Լեյքի» կազմում անցկացրել է 29 հանդիպում և դարձել 9 գոլի հեղինակ: Անցյալ տարի հայ հարձակվողը ամերիկյան ակումբի կազմում մասնակցելով 28 հանդիպման՝ դարձել էր 7 գոլի հեղինակ: