ԱՄՆ Կինոակադեմիայի անդամներն այսօր սկսում են քվեարկությունը «Օսկար» հեղինակավոր կինոմրցանակի հաղթողների համար։ Մրցանակաբաշխությունը տեղի կունենա Լոս Անջելեսում, մարտի 4-ին։
Շաբաթվա ընթացքում ակադեմիայի անդամները կարող են քվեարկել ինչպես համացանցում, այնպես էլ թղթե քվեաթերթիկները լրացնելով։ «Թղթային» քվեարկությունը կանցկացվի վերջին անգամ, հաջորդ տարվանից կինոակադեմիան լիովին անցում կկատարի առցանց քվեարկության ձևաչափի։
«Լավագույն ֆիլմ» անվանակարգում գլխավոր մրցանակին այս տարի հավակնում է 9 ֆիլմ՝ «Հեռացի՛ր», «Լեդի Բըրդ», «Թափանցիկ թելը», «Մութ ժամանակներ», «Ջրի ձևը», «Երեք ցուցավահանակ Էբինգի սահմանին, Միսսուրի», «Կոչի՛ր ինձ քո անունով», «Դյունքըրք» և «Գաղտնի դոսյեն»։
Հոբելյանական՝ 90-րդ արարողությունը կանցկացվի Dolby Theatre-ում։ Մրցանակներ կհանձնվեն 24 անվանակարգերում։ Արարողության հաղորդավարը երկրորդ տարին անընդմեջ կլինի կատակերգու Ջիմի Քիմելը։