Ռուսաստանի և Թուրքիայի նախագահներ Վլադիմիր Պուտինի և Ռեջեփ Թայիփ Էրդողանի հանդիպումը ծրագրվում է Թուրքիայում, ապրիլի սկզբին։ Այս մասին հայտնել է Թուրքիայի փոխվարչապետ Բեքիր Բոզդաղը։
«Սիրիայի խնդիրների կարգավորմանն ուղղված բանակցությունները Թուրքիայի, Ռուսաստանի և Իրանի միջև շարունակվում են։ Մարտի 14-ին Մոսկվայում կանցկացվի հանդիպում՝ մեր արտգործնախարարների մասնակցությամբ։ Մարտի 16-ին Աստանայում Իրանի մասնակցությամբ կանցկացվի եռակողմ հանդիպում»,-ասել է փոխվարչապետը։
Բոզդաղի հաղորդմամբ՝ Ռուսաստանի և Թուրքիայի նախագահների հանդիպման հստակ ամսաթիվը դեռևս որոշված չէ։ Դրանից հետո, ինչպես սպասվում է, կանցկացվի Սիրիայի հարցով Ռուսաստան-Թուրքիա-Իրան գագաթնաժողովը։ Երեք երկրների նախագահների հանդիպումը պատրաստվում է, հաստատել է ՌԴ նախագահի մամլո քարտուղար Դմիտրի Պեսկովը։
Երեկ Պուտինն ու Էրդողանը հեռախոսազրույցի ժամանակ քննակել էին իրավիճակը Սիրիայում։
«Հաստատվել է Ռուսաստանի, Թուրքիայի, Իրանի ջանքերի համակարգման պատրաստակամությունը՝ դեէսկալացիոն գոտիների արդյունավետ գործունեության ապահովման և քաղաքական գործընթացի խթանման նպատակով»,-հայտնել են Կրեմլում։
