ԱՄՆ-ում նշում են դաշնային տոն՝ Նախագահների օրը, և այդ իսկ պատճառով Հյուսթոնի և Բոյսեի (Այդահո) համալսարանները կազմել են ԱՄՆ պատմության ողջ ընթացքում նախագահների ամենամյա վարկանիշը։
Վարկանիշը կազմվել է 170 գիտնական-քաղաքագետների շրջանում հարցման հիման վրա, ովքեր հանդիսանում են Քաղաքական գիտությունների ամերիկյան ասոցացիայի նախագահական բաժնի անդամներ։
Նրանք գնահատել են յուրաքանչյուր նախագահի մեծությունը 0-100 բալանոց սանդղակով։
Ցուցակը գլխավորել է ստրուկների ազատագրող Ավրամ Լինքոլնը՝ 95.03 միավորով։ Նրան հաջորդում է պետության առաջին ղեկավար Ջորջ Վաշինգտոնը՝ 92.59 միավորով։ Նրանց հաջորդում են Ֆրանկլին Ռուզվելտը, Թեոդոր Ռուզվելտը, Թոմաս Ջեֆերսոնը, Հարի Տրումենը և Դուայթ Էյզենհաուերը։ Առաջին 7 տեղերի բաշխվածությունը չի փոխվել 2014 թվականից, երբ առաջին անգամ անցկացվել է համապատասխան հարցումը։
Նախկին նախագահ Բարաք Օբաման բարելավել է անցած տարվա դիրքը՝ բարձրանալով 10-րդ տեղից 8-րդ տեղ՝ 71 միավորով։
Գործող նախագահ Դոնալդ Թրամփը վերջից առաջին տեղն է զբաղեցրել՝ հավաքելով 12.34 միավոր։ Նա զիջել է նույնիսկ ավանդաբար ոչ հանրաճանաչ նախագահներին՝ Ջեյմս Բյուկենենին, Ուիլյամ Հենրի Հարրիսոնին և Ֆրանկլին Փիրսին։
