ՑԱԽԱԼ-ի Գլխավոր շտաբի Օպերատիվ վարչության պետ, գեներալ-մայոր Ալոն Նիցանը նախազգուշացնում է, որ 2018 թվականին ռազմական գործողությունների մեկնարկի ռիսկը հանդիսանում է շատ ավելի բարձր, քան նախորդ տարիներին։
Բարձրագույն ռազմական ղեկավարության ներկայացուցչի խոսքով՝ նման ռիսկը բարձրանում է Սիրիայի, Իրանի և այլոց հետ Իսրայելի հարաբերությունների աստիճանաբար վատթարացման պատճառով։ Այդ իսկ պատճառով, ինչպես նշել է գեներալ-մայորը, բանակը բերվել է մարտական բարձր պատրաստության։
Ալոն Նիցանն առանձնահատուկ անհանգստություն է արտահայտել առ այն, որ Իրանն էականորեն մեծացնում է իր ներկայությունը Սիրիայում՝ դառնալով էլ ավելի մեծ սպառնալիք։
Անցած շաբաթ Իսրայելի վարչապետ Բենյամին Նեթանյահուն Անվտանգության հարցերով մյունխենյան համաժողովի ժամանակ ցուցադրել էր Իսրայելի գլխավերևում խոցված անօդաչու սարքի բեկոր՝ նշելով, որ այն իրանական է։