Կրթության և գիտության նախարար Լևոն Մկրտչյանը այսօր կայացած իր ասուլիսի ժամանակ այդպես էլ չանդրադարձավ Շիրակի պետհամալսարանում տիրող վիճակին, ռեկտոր Սահակ Մինասյանի ապօրինություններին, որի պատճառով պատմության և փիլիսոփայության ամբիոնի վարիչի պաշտոնակատար Հովհաննես Խորիկյանը մի քանի օր հացադուլ էր հայտարարել։ Խորիկյանը հացադուլը դադարեցրեց իր ընկերների, դասախոսների հորդորներից հետո, բայց արդեն մեկ շաբաթ է՝ բուհում դասադուլ է, որը շարունակվել է նաև այսօր, սակայն նախարարությունը որևէ կերպ չի արձագանքւոմ Շիրակի պետհամալսարանում ստեղծված վիճակին։
Խնդիրները, որոնց մասին փորձ էր արվում բարձրաձայնել ծայրահեղ քայլի միջոցով, շարունակում են մնալ չլուծված։
Շիրակի պետհամալսարանի դասախոս, գյումրեցի քաղաքագետ Գագիկ Համբարյանը «Առաջին լրատվական»-ի հետ զրույցում ասաց, որ իրենք պայքարը շարունակելու են, քանի որ Սահակ Մինասյանը գնալով ինչ ուզում անում է, և որևէ կերպ «նրա դեմն առնող չկա»։ «Մենք մտադրություններ չունենք զիջելու։ Պարոն Մինասյանը իրեն լկտի է պահում բառի բուն իմաստով՝ հայտարարելով, որ ինքն անում է այն, ինչ ուզում է։ Իսկ այդ թողտվության թույլտվությունը նրան տրված է կրթության և գիտության նախարարի կողմից։ Բուհի ռեկտորը բացահայտ ինչ ուզում՝ անում է, իսկ նախարարը լռում է, որից կարելի է հետևություն անել, որ դա հենց այնպես չէ, այդ ամենը անվճար չի կատարվում։ Ինչ-որ կերպ պարոն Մինասյանը իր շնորհակալությունը հայտնում է նախարարին, ով մինչև հիմա մեր կողմից բացահայտված հանցագործություններին չի արձագանքում»,- ասաց Համբարյանը։
Իսկ հանցագործությունները բազմազան են՝ սկսած ռեկտորի կողմից բուհի կանոնադրության կոպտագույն խախտումներից վերջացրած գնումների գործընթացով։ «Փետրվարի 13-ին Սահակ Մինասյանը նշանակել է որոշ ֆակուլտետների և ամբիոնների վարիչների ընտրություն, այն դեպքում, երբ բուհի գիտական խորհուրդը իրավունք չունի այն իրականացնել։ Ըստ կանոնադրության՝ բուհի դեկանները և ամբիոնների վարիչները ընտրվում են բուհի ֆակուլտետային խորհուրդներում և հաստատվում են գիտական խորհրդում։ Իսկ Սահակ Մինասյանը որոշում է կայացրել, որ ընտրությունը անմիջականորեն պետք է անցկացնի գիտական խորհուրդը, որը հակաօրինական է»,- նշեց Համբարյանը՝ հավելելով, որ իրենք ԿԳ նախարարից պահանջել են անմիջապես բեկանել կայացված ընտրությունների արդյունքները, սակայն նախարարը որևէ կերպ չի արձագանքել առկա բողոքներին և դժգոհություններին։
«Սրանից հետո բուհում արդեն շշուկներ են պտտվում, թե ինչ արժե պարոն նախարարի լռությունը։ Ինչ գին է վճարում նրա ընկերը, որը թույլ է տալիս անտեսել բուհի կանոնադրությունը»,- նշեց Համբարյանը։
Հաջորդ խնդիրը վերաբերում է բարձր ՄՕԳ ունեցող ուսանողների զեղչերի նվազեցմանը 10-15 տոկոսի չափով։ Պարոն Մինասյանը, սակայն, որոշել է այս կիսամյակի համար զեղչերը նվազեցնել, այն էլ՝ աղքատության հայրենիք համարվող Շիրակի մարզում։ Ընդ որում, առանց պատճառաբանելու, թե խնայված գումարները ինչի համար են անհրաժեշտ։
