Հայաստանի Հանրապետական Կուսակցությունը հայտ է ներկայացրել անդամակցելու Միջազգային Քրիստոնեա-դեմոկրատական միությանը: Այդ մասին տեղեկացրել է ՀՀԿ փոխնախագահ Արմեն Աշոտյանը:
Քաղաքագետ Ստեփան Դանիելյանը հիշեցնում է, որ այս նախաձեռնության նախապատմությունը սկսվել է դեռևս 3 տարի առաջ՝ 2015թ-ին, երբ Արմեն Աշոտյանը դեռևս ԿԳ նախարարն էր․ այդ ժամանակ Աշոտյանը Գերմանիայում հանդիպել էր Քրիստոնեա-դեմոկրատական կուսակցությունների միության ներկայացուցիչների հետ և համագործակցության համար պայմանավորվածություն էր ձեռք բերել և հիմա այս ներկայացրած հայտը ըստ Ստեփան Դանիելյանի՝ այդ նախաձեռնության շարունակությունն է։
«Իմ կարծիքով՝ ՀՀԿ-ի համար սկզբունքորեն միևնույնն է , թե որ խոշոր միության հետ հետ նրանք կմիավորվեն և ցանկություն կհայտնեն ինտեգրվելու, կարևորը՝ Եվրոպայում քաղաքական հենարան ստանալն է։ Մի միության անդամ դառնալը մեկ բան է, սակայն այդ միությանը ռեալ միս ու արյուն տալը, այդ արժեքային համակարգն ընդունելը՝ լրիվ այլ բան, իսկ եթե կետ առ կետ վերլուծենք Քրիստոնեա-դեմոկրատական կուսակցության արժեհամակարգը, նրանց գաղափարախոսությունները, ապա կտեսնենք, որ ՀՀԿ-ն դրանց հետ որևէ ընդհանրություն, որևէ առնչություն չունի»,- «Առաջին լրատվական»-ի հետ զրույցում նման համոզմունք հայտնեց Ստեփան Դանիելյանը։
Վերջինիս նաև հավելեց․ «ՀՀԿ-ն կարող է միջազգային ցանկացած կուսակցության անդամագրվել, այսինքն հնարավոր է, որ վաղը-մյուս օրը չստացվի Քրիստոնեա-դեմոկրատական կուսակցությանն անդամագրվելը և մեկ էլ մեկ տարի հետո պարզվի, թե ՀՀԿ-ն սոցիալիստական կուսակցություն է և այդ ժամանակ էլ փորձեն սոցիալիստական կուսակցությունների միության մեջ անդամագրվել կամ այլ կուսակցությունների անդամագրվել, այսինքն՝ այս ամբողջ ունի արտաքին տանիքի որոնման նպատակ, բայց գաղափարախոսական առումով ՀՀԿ-ի համար բացարձակ մեկ է ՝ որտեղ անդամագրվել, կարևորը՝ տանիք գտնել և այդ տանիքն օգտագործել իրենց նպատակների համար»։
Մանրամասները՝ տեսանյութում։