Ֆլորիդայի դպրոցներից մեկում հրաձգությունը մտել է ԱՄՆ նորագույն պատմության ամենամահաբեր զանգվածային սպանությունների տասնյակի մեջ:
Ինչպես ամեն անգամ, այն հասարակության և քաղաքական գործիչների շրջանում ծնել է դեբատներ հրաձգային զենքի հասանելիության թեմայով: Ոմանք, նախատելով մարդասպանին, ամենայն վստահությամբ պնդում են, որ նրա հրացանը կապ չունի: Այս կարծիքի հակառակորդները պահանջում են զենքի նկատմամբ վերահսկողության շտապ միջոցներ ձեռնարկել՝ հայտարարելով, որ այլևս չի կարելի սպասել: Դրանց թվում է նաև աշակերտներից մեկը, որը փրկվել է զանգվածային հրաձգության ժամանակ:
Այս վեճը պետք է լուծեն քաղաքական գործիչները, բայց նրանք էլ բաժանվել են մի քանի ճամբարների: Նրանցից ոմանք սահմանափակվում են ցավակցություններով, իսկ մյուսները կոնկրետ առաջարկներով են հանդես գալիս:
Հիլարի Քլինթոնը, ինչպես միշտ, կոչ է արել զենքի նկատմամբ վերահսկողություն սահմանել: Հանրապետական սենատոր Լարի Փիթմանը առաջարկում է խնդիրը լուծել արմատապես այլ կերպ: Նրա կարծիքով՝ պետք է զինել ուսուցիչներին. «Մենք պետք է դպրոցական անձնակազմին հնարավորություն տանք պաշտպանելու իրենց և աշակերտներին»,- քաղաքական գործչի խոսքերն է մեջբերում Charlotte News and Observer-ը:
