Անկարան պատերազմ չի վարում Սիրիայում, խոսքն ահաբեկչության դեմ պայքարի մասին է, հայտարարել է Թուրքիայի վարչապետ Բինալի Յըլդըրըմը՝ ելույթ ունենալով անվտանգության հարցերով 54-րդ մյունխենյան համաժողովում։
«Սիրիայում չկա պատերազմ, դա պայքար է ահաբեկչության դեմ, որին մասնակցում է ոչ միայն Թուրքիան, այլև կոալիցիայի կազմի մեջ մտնող 62 պետությունները, ինչպես նաև Ռուսաստանն ու Իրանը։ Մենք հանդիսանում ենք ՆԱՏՕ-ի անդամ, մենք հանդիսանում ենք մեր կոալիցիայի մաս, ապահովում ենք կոալիցիայի աջակցությունն օդում, ՆԱՏՕ-ն կիրառում է Թուրքիայի ռազմաօդային բազաները, որոնք հնարավոր են դարձրել գործողությունը»,-հայտարարել է Թուրքիայի վարչապետը։
Յըլդըրըմի խոսքով՝ Սիրիայում և Իրաքում արդեն բավականին հաջող կերպով հաղթանակ է տարվել մի ահաբեկչական կազմակերպության նկատմամբ, սակայն հիմա ահաբեկիչները նորովի խմբավորվել են նոր անվան ներքո և կիրառում են ռուսական և ամերիկյան սպառազինություն, որը նրանք ստանում են անօրինական ճանապարհով, այդ թվում համացանցով պատվիրելու միջոցով։
