ԱՄՆ-ը կշարունակի ամուր աջակցությունը Վրաստանին ինչպես երկրի պաշտպանունակության բարձրացման տեսանկյունից, այնպես էլ՝ եվրոպական և եվրոատլանտյան կառույցներին ինտեգրվելու գոծընթացում: Այս մասին շաբաթ օրը Մյունխենում հայտարարել է ԱՄՆ պաշտպանության նախարար Ջեյմս Մետիսը Վրաստանի վարչապետ Գեորդի Կվիրիկաշվիլիի հետ հանդիպման ժամանակ: Նրա խոսքերը մեջբերվում են Վրաստանի կառավարության մամլո ծառայության շաբաթ օրը հրապարակած հաղորդագրության մեջ:
Նշվում է, որ Կվիրիկաշվիլին «ԱՄՆ-ին շնորհակալություն է հայտնել Վրաստանին աջակցության համար՝ նշելով, որ անցած տարին առանձնակի հաջող է եղել երկու երկրների համագործակցության զարգացման առումով»:
Հանդիպման ժամանակ կողմերը քննարկել են «տարածաշրջանային անվտանգության և երկու երկրների համագործակցության զարգացման հարցեր»: «Շեշտադրվել է ուշադրությունը պաշտպանության ոլորտում Վրաստանում բարեփոխումների ընթացքին, ՆԱՏՕ-ին երկրի անդամակցության ինտեգրման գործընթացին, ընդգծվել է, որ ԱՄՆ-ը Վրաստանին հաստատապես աջակցում է ՆԱՏՕ-ին ինտեգրման գործում»,- ասվում է հաղորդագրության մեջ: