Թուրքիան առաջարկել է ԱՄՆ–ին համատեղ զինվորականներ տեղակայել Սիրիայի տարածքում, փոխարենը դուրս հանելով քրդական ջոկատները Թուրքիայի հետ սահմանամերձ շրջանից։
ԱՄՆ պետքարտուղար Ռեքս Թիլերսոնը Թուրքիայի ԱԳ ղեկավար Մեվլյութ Չավուշօղլուի և նախագահ Ռեջեփ Թայիպ Էրդողանի հետ հանդիպումից հետո հայտարարել է, որ երկու երկրների հարաբերությունները գտնվում են ճգնաժամային վիճակում։
«Մենք որոշել ենք, և նախագահ Էրդողանն է որոշել երեկ երեկոյան, որ պետք է քննարկենք ելքի ուղիները։ Մեր հարաբերությունները չափազանց կարևոր են»,– ասել է Ռեքս Թիլերսոնը։
Թիլերսոնի երկօրյա այցը Թուրքիա ընթանում է երկու երկրների միջև հարաբերությունների բարդացման ֆոնի վրա։
Եթե թուրքական գրոհը տեղափոխվի դեպի արևելք՝ Մանբիջի ուղղությամբ, հավանականություն կա, որ ռազմական գործողությունների գոտին կընդլայվի մինչև այն շրջանները, որտեղ տեղակայված են ամերիկյան հատուկ զորքերը։
Թուրքիայի վարչապետ Մեվլյութ Չավուշօղլուն հայտարարել է, որ Թուրքիան պատրաստ է տարածաշրջանում ԱՄՆ–ի հետ համատեղ միջոցառումների, եթե Քրդական ինքնապաշտպանական ջոկատները լքեն Մանբիջ քաղաքը։
Թուրքիան ԱՄՆ–ին առաջարկում է Սիրիայի հյուսիսային տարածաշրջանում համատեղ զորքեր տեղակայել՝ անվտանգության ապահովման համար։
«Շատ կարևոր է, թե հատկապես ով է ղեկավարելու և ապահովելու այս տարածաշրջանների անվտանգությունը»,– ասել է Չավուշօղլուն։ Մենք կհամակարգենք մեր ջանքերը, որպեսզի Մանբիջում և այլ քաղաքներում վերականգնենք կայունությունը։ Մենք կսկսենք Մանբիջից։ Այն բանից հետո, երբ Ազգային ինքնապաշտպանության ջոկատները կլքեն այն, մենք, ԱՄՆ–ի հետ կարող ենք փոխվստահության վրա հիմնված համատեղ քայլեր ձեռնարկել»։