Վերաքննիչ քրեական դատարանում այսօր՝ փետրվարի 16-ին շարունակվում է Հայաստան «Իգլա» տեղափոխելու եւ փողերի լվացման մեղադրանքով 6 տարվա ազատազրկման դատապարտված Լեռնային Ղարաբաղի պաշտպանության բանակի նախկին հրամանատար Սամվել Բաբայանի գործով վերաքննիչ բողոքի քննությունը:
Նշենք, որ այս գործով 3 տարվա ազատազրկման դատապարտված Սանասար Գաբրիելյանը եւս դիմել է Վերաքննիչ դատարան: Նա պահանջում է բեկանել Երեւան քաղաքի Կենտրոն եւ Նորք-Մարաշ վարչական շրջանների ընդհանուր իրավասության դատարանի դատավճիռը եւ իրեն ճանաչել անպարտ:
Սամվել Բաբայանի շահերի պաշտպան Ավետիս Քալաշյանը միջնորդեց կրկին անգամ ուսումնասիրել մի քանի ձայնագրություններ, որոնց ամսաթվերը նա նշեց, սակայն մեղադրող դատախազը առարկեց միջնորդության դեմ: Արամ Արամյանը նշեց, որ այդ ձայնագրությունները առաջին ատյանի դատաքննության ժամանակ պատշաճ հետազոտվել են:
Խորհրդակցելուց հետո նախագահող դատավոր Սևակ Համբարձումյանը հայտարարեց, որ դատարանը մերժում է միջնորդությունը:
