Ազգային ժողովն այսօր՝ փետրվարի 16-ին, հրավիրել է արտահերթ նիստ «Ելք» և «Ծառուկյան» խմբակցությունների՝ Հարկային օրենսգրքում փոփոխություններ անելու նախաձեռնությամբ:
«Հենց հիմա ասեք ձեր առաջարկը, և մենք ընդունում ենք»,- դիմելով ՀՀԿ խմբակցության պատգամավոր Խոսրով Հարությունյանին՝ ասաց «Ելք» խմբակցության ղեկավար Նիկոլ Փաշինյանը:
Նրա խոսքով՝ Հ1-ը օրը 6 անգամ ՏՄՊՊՀ տղերքին էր ցույց տալիս, ովքեր գալստուկով գնում թվերն էին գրում ու զեկուցում՝ թե, ժողովուրդ, հանգստացեք, էս թանկացումներն ակցիզային գներից են: Նա հիշեց անեկդոտը. ««Ապեր, քշի, հարց չկա, էդ ես եմ»: Հիմա մենք էդ հանձնաժողովին վստահո՞ւմ ենք, թե՞ չէ»:
«200 հազար աշխատավարձ ստացող մարդը սոցիալապես խոցելի՞ է, թե՞ ոչ»,- հարցրեց Փաշինյանը:
Նա նշեց, որ ներքին շեմն իջեցնելու առաջարկի շուրջ կխորհրդակցեն, ինչին Խոսրով Հարությունյանն արձագանքեց՝ բայց էդ առաջարկը դեռ պետք է կառավարությունն ընդունի: «Եթե մենք ընդունում ենք, ձե՛ր կառավարությունը ո՞նց կարա ձեր առաջարկը չընդունի»,- հակադարձեց Փաշինյանը:
Նրա խոսքով՝ մեծամասնության հույսն այն է, որ հեսա գարունը եկավ, կանաչին դուրս կգա, և այս խոսակցությունը կդադարի:
Մանրամասները՝ տեսանյութում:
