Լավ գիտենք, որ Ադրբեջանի հարաբերությունները հարևան Հայաստանի հետ լարված են, իսկ Ալիևի արած վերջին հայտարարությունը լարվածությունը թուլացնելուն ակնհայտորեն չի նպաստում` հայտարարել է ՌԴ ԱԳՆ պաշտոնական ներկայացուցիչ Մարիա Զախարովան ամենշաբաթյա ճեպազրույցի ժամանակ, անդրադառնալով հայ լրագրողի այն հարցին, թե ՌԴ-ն համարվում է ԵԱՀԿ ՄԽ համանախագահ երկիր, և այդ համատեքստում ինչպիսինն է դիրքորոշումը Ադրբեջանի նախագահ Իլհամ Ալիևի՝ «Երևանն ու Զանգեզուրը ադրբեջանական հողեր լինելու և դրանք հետ վերադարձնելու մասին» «Ենի Ազերբայջան» կուսակցության համագումարի ժամանակ արված հայտարարությանը:
Ռուսաստանի արտգործնախարարի այս հայտարարությունն ինքնին կանխատեսելի էր և, ըստ էության, տեղավորվում է ԵԱՀԿ Մինսկի խմբի համանախագահության վերջին հայտարարության համատեքստում: Զախարովայի խոսքը հասցեական է ստացվել միայն այն պատճառով, որ լրագրողի հարցը վերաբերել է կոնկրետ Ալիևի ելույթին: Մյուս կողմից` Ռուսաստանի արտաքին քաղաքական գերատեսչության ներկայացուցչի խոսքի հասցեականությունն ավելի շուտ պետք է դիտարկել ոչ թե կարգավորման գործընթացի, այլ ռուս-ադրբեջանական հարաբերությունների համատեքստում: Մոսկվայի և Բաքվի հարաբերություններում, էներգետիկ խնդիրներով պայմանավորված, լարվածությունն ակնհայտորեն պահպանվում է, և վերջին շրջանում Մոսկվան առիթը բաց չի թողնում` Բաքվին հասկացնելու, որ չի պատրաստվում իր աջակցությամբ լեգիտիմացնել Ալիևի ագրեսիվ քաղաքականությունը:
Այսօրվա ասուլիսում Զախարովան մեկ այլ առիթով էլ հասկացրել է, որ Մոսկվայում, մեղմ ասած, չեն կիսում Բաքվի իշխանության շրջանակներում շրջանառվող տեսակետները:
Ադրբեջանցի լրագրողի հարցին, թե Ադրբեջանում նախագահական ընտրություններից հետո ԼՂ հակամարտության լուծման ուղղությամբ ինչ լուրջ զարգացումներ կարող են լինել, Զախարովան նշել է, որ Մոսկվան հույս ունի, որ ԼՂ հակամարտությունը լուծում կունենա:
Ռուսաստանի ԱԳ խոսնակի պատասխանը ստանդարտ է` առանց ժամկետային կամ բովանդակային հստակեցումների: Զախարովան, ըստ էության, հասկացրել է, որ ուղղակի կապ չի տեսնում Ադրբեջանի նախագահական ընտրությունների և կարգավորման գործընթացի միջև: Բաքվում այս օրերին պաշտոնական շրջանակները և քարոզչությունը արտահերթ ընտրությունները մոտիվացնում են հենց այն հանգամանքով, որ դրանից հետո նոր թափ է հաղորդվելու կարգավորման գործընթացին:
Մարիա Զախարովան այսօր, ըստ էության, որևէ նոր բան չի ասել կարգավորման գործընթացի մասին` թեև այդ թեմայով հազիվ թե միջնորդական որևէ երկիր նոր մոտեցում կամ կարծիք ունենա: Այնուամենայնիվ, Զախարովայի ասուլիսի ղարաբաղյան հատվածը ուշագրավ է Ալիևի վերջին հայտարարությունների ֆոնին` առնվազն այն իմաստով, որ Բաքվում չեն կարող հույս դնել Մոսկվայի քարտ-բլանշի կամ 2016-ի ապրիլի սցենարի կրկնության վրա:
