Միացյալ Նահանգները ծանուցել է այլ երկրների, այդ թվում՝ Հայաստանի կառավարությանը այն մասին, որ Ռուսաստանի ռազմաարդյունաբերական ընկերությունների հետ «էական գործարքներ» ստորագրելու պարագայում այդ երկրները կարող են հայտնվել ամերիկյան պատժամիջոցների թիրախում: Այսպիսի պատասխան են տվել Հայաստանում ԱՄՆ-ի դեսպանությունից «Հայկական ժամանակ» օրաթերթի հարցմանը:
«Եղել է ծանուցում այլ երկրների կառավարություններին և մասնավոր ընկերություններին, որ ցանկում ներառված ռուսական ընկերությունների հետ կնքված նշանակալի գործարքների դեպքում՝ հնարավոր է պատժամիջոցների կիրառում: Մենք նախապես չենք քննարկում մեր պատժամիջոցները: Մենք հայտարարում ենք այդ պատժամիջոցները, երբ այդպիսիք կան և եթե այդպիսիք կան», – նշել է դեսպանատան մամուլի ծառայությունը:
Այս թեման վերջին ամսվա ընթացքում ակտիվորեն քննարկվում է թե՛ հայկական, թե՛ ամերիկյան և թե՛ ռուսական մամուլում: Ամերիկայի արտաքին քաղաքականության խորհուրդ American Foreign Policy Council) վերլուծական կենտրոնի ավագ գիտաշխատող Սթիվեն Բլանկը «Ամերիկայի ձայն»-ին տված հարցազրույցում ասել էր, թե ամերիկյան նոր պատժամիջոցները Ռուսաստանի ռազմաարդյունաբերական ընկերությունների նկատմամբ կարող են ազդել ոչ միայն Ռուսաստանի, այլև այլ երկրներին ռուսական զենք մատակարարելու վրա: Ամերիկացի փորձագետները հույս ունեն, որ ամերիկյան պատժամիջոցները կսահմանափակեն ռուսական զենքի մատակարարումները Ղարաբաղյան հակամարտության կողմերին՝ նվազեցնելով պատերազմի ռիսկերը և ակտիվացնելով խաղաղության գործընթացը: Այս տեսանկյունից հեռանկարն, իհարկե, բավական խոստումնալից է, բայց մյուս կողմից, եթե հիշենք, որ սպառազինությունների մրցավազքը փաստացի պարտադրված է Հայաստանին ֆինանսական մեծ հնարավորություններ ունեցող և ագրեսիվ քաղաքականություն իրականացնող Ադրբեջանի կողմից՝ ամերիկյան պատժամիջոցների ազդեցությունն այնքան էլ դրական չի դիտվում Հայաստանի համար: Ի՞նչ այլընտրանք ունի Հայաստանը, եթե հրաժարվի ռուսական սպառազինությունից և անվտանգությունից: Եվ որքանո՞վ է իրական ամերիկյան պատժամիջոցների թիրախում հայտնվելու վտանգը, որի մասին նշել է ամերիկյան դեսպանությունը:
Մոսկվայի Մերձավոր Արևելքի ինստիտուտի նախագահ, արևելագետ Եվգենի Սատանովսկին զարմացած է, որ այս վտանգը Հայաստանում նորություն են համարում:
«Սա հին տեղեկություն է, որը հայտնի է ամբողջ աշխարհին: Զարմացած եմ, որ սա ձեզ համար նորություն է: Այո, գոյություն ունի ցուցակ, որի մեջ ներառված են բոլորը, բացի Պուտինից, Չուբայսից և կենտրոնական բանկի նախագահ Նաբիուլինայից: Մնացածին Կոնգրեսում անվանել են Միացյալ Նահանգների թշնամիներ: Հետո ի՞նչ»,- «Առաջին լրատվական»-ի հարցին ի պատասխան ասաց Սատանովսկին:
Փորձագետի կարծիքով՝ ռուսական զենքի մատակարարումների հնարավոր սահմանափակումը խնդիր չէ Հայաստանի համար. «Հայաստանի խնդիրը Հայաստանը գրավելու Ադրբեջանի մտադրությունն է: Նախորդ շաբաթ մի տեղից լսեցի, թե «Երևանը ադրբեջանական քաղաք է»: Սա խնդիր է ձեզ համար: Հայաստանի խնդիրը Թուրքիան է, որը փորձում է, որը հրահրում է Ադրբեջանին Հայաստանի դեմ: Հայաստանն այլ խնդիր չունի»:
«Ռուսաստանը գլոբալ քաղաքականությունում» ամսագրի գլխավոր խմբագիր, քաղաքական վերլուծաբան Ֆյոդոր Լուկյանովը կարծում է, որ ամերիկյան պատժամիջոցների թիրախում հայտնվելու վտանգ իսկապես կա, բայց դժվարանում է ասել՝ ինչ պիտի անի Հայաստանն այս իրավիճակում:
«Միացյալ Նահանգները դրա համար էլ ընդունում է այդ օրենքները պատժամիջոցների մասին, որպեսզի առավելագույնս ճնշում գործադրի Ռուսաստանի նկատմամբ բոլոր ուղղություններով, հնարավորինս սահմանափակի Ռուսաստանի քաղաքական և տնտեսական կապերը, վախեցնի նրա դաշնակիցներին, գործընկերներին: Միացյալ Նահանգները կարող է դա անել՝ շնորհիվ համաշխարհային ֆինանսա-տնտեսական համակարգում իր բացառիկ դերակատարության: Այնպես որ, նման վտանգ իսկապես կա: Չգիտեմ՝ ինչ պիտի անի Հայաստանը: Իհարկե, ինչպես Հայաստանը, այնպես էլ Ռուսաստանի մյուս մերձավոր դաշնակիցները բարդ վիճակում են հայտնվում, բայց ի՞նչ արած, այսպիսին է աշխարհը»,- «Առաջին լրատվական»-ի հետ զրույցում նշեց Լուկյանովը:
Խոսելով այն հարցի մասին, թե ի՞նչ մեխանիզմներով ԱՄՆ-ը կարող է ազդել Ռուսաստանի ռազմական գործարքների վրա, Լուկյանովը բերեց ֆրանսիական Պարիբա բանկի օրինակը, որի նկատմամբ պատժամիջոցներ սահմանվեցին 9 մլրդ դոլարի չափով այն բանի համար, որ ԱՄՆ-ի կարծիքով՝ այդ բանկը խախտել է Իրանի նկատմամբ սահմանված ամերիկյան պատժամիջոցների ռեժիմը:
«Նրանք գործի կդնեն նմանատիպ գործիքներ, եթե իսկապես որոշեն այդ քայլն անել»,- ավելացրեց ռուսաստանցի վերլուծաբանը: