ՀՀ ԱԺ արտաքին հարաբերությունների մշտական հանձնաժողովի նախագահ Արմեն Աշոտյանը փետրվարի 14-ին Թբիլիսիում հանդիպում է ունեցել Վրաստանի խորհրդարանի եվրոպական ինտեգրման հանձնաժողովի նախագահ, Եվրանեսթ ԽՎ-ում Վրաստանի խորհրդարանական պատվիրակության ղեկավար Թամար Խուլորդավայի հետ:
Հանդիպմանը մասնակցել է նաև ՀՀ ԱԺ արտաքին հարաբերությունների մշտական հանձնաժողովի անդամ Կարեն Բեքարյանը:
Ինչպես տեղեկացրին ՀՀ ԱԺ հանրային կապերի վարչությունից, հայ և վրացի գործընկերներն անդրադարձել են երկու երկրների խորհրդարանների հանձնաժողովների միջև կապերի ամրապնդմանն ու փոխգործակցության ակտիվացմանը, մասնավորապես, Արևելյան գործընկերության շրջանակում:
Անդրադառնալով Եվրոպական միության հետ համագործակցության ընդլայնմանը՝ կողմերը կարևորել են Հայաստանի Հանրապետության և Եվրոպական միության միջև Համապարփակ և ընդլայնված գործընկերության համաձայնագրի ստորագրումը, այս համատեքստում եվրոպական ինտեգրման ուղղությամբ աշխատանքներում Վրաստանի հետ փորձի փոխանակումը: Արմեն Աշոտյանը նաև նշել է, որ Հայաստանը մեծապես կարևորում է գործընկեր պետությունների հետ եվրամերձեցման գործընթացում առավել ակտիվ փոխգործակցությունը: Հանձնաժողովի նախագահը հավելել է, որ համաձայնագիրը Հայաստան-Եվրոպա դիվանագիտական ջանքերի արդյունք է և հույս հայտնել, որ այս հաջողության պատմությունն իր դրական ազդեցությունը կունենա նաև Արևելյան գործընկերության երկրների հետ փոխգործակցության խթանման գործում:
Հանդիպման ընթացքում կողմերն անդրադարձել են հանրային ներգրավվածության միջոցով խորհրդարանական վերահսկողության գործիքակազմի կիրառման հարցերին:
Անդրադառնալով երկու երկրներում իրականացված սահմանադրական բարեփոխումներին՝ Արմեն Աշոտյանը, նշելով, որ Հայաստանը հետևողականորեն անցում է կատարում խորհրդարանական կառավարման, կարևորել է խորհրդարանական ժողովրդավարական հասարակության կերտման համատեքստում փորձի փոխանակումը:
Հանդիպման ընթացքում կողմերը նշել են, որ երկու երկրների խորհրդարանների համագործակցության ներկա փուլում օրակարգային է ԵՄ ինտեգրման, խորհրդարանական վերահսկողության և խորհրդարանական դիվանագիտության հարցերի շուրջ փորձի փոխանակումը: Արմեն Աշոտյանը վերահաստատել է Հայաստանի պատրաստակամությունը երկուստեք հետաքրքրություն ներկայացնող հարցերում առավել սերտ փոխգործակցության վերաբերյալ: