ԳԱԱ արևելագիտության ինստիտուտի տնօրեն, թուրքագետ Ռուբեն Սաֆրաստյանը չի բացառում, որ Ադրբեջանն ընտրություններից առաջ իր բնակչության վստահությունը շահելու և ագրեսիվ հռետորաբանությունն ուժեղացնելու ճանապարհով կարող է ռազմական գործողություններն ակտիվացնել հայ-ադրբեջանական սահմանին: «Մենք պետք է չկորցնենք մեր զգոնությունը, քանի որ հարևան ենք մի երկրի, որը բացահայտ հայտարարում է, որ պատրաստ է Հայաստանի և Արցախի դեմ ագրեսիա իրականացնել: Զգոնությունը մեզ համար միշտ կենսական նշանակություն ունի»,- ասաց նա:
Սաֆրաստյանի խոսքով` Ադրբեջանն ամեն կերպ հարվածներ է հասցնում Մինսկի խմբի համանախագահների միջնորդական առաքելությանը, և ժամանակ առ ժամանակ այդ հարվածներն ընդունում են սուր բնույթ:
«Չեմ կարծում,որ Ադրբեջանը ներկայումս իրական ցանկոթյուն ունի դուրս գալու Մինսկի խմբի բանակցային գործընթացից, ես ենթադրում եմ, որ ապրիլից հետո Ադրբեջանը կփորձի կորզել որոշակի առավելություն բանակցային գործընթացում»,-նշեց նա՝ հավելելով, որ Ադրբեջանում իրադրությունը կարող է սրվել նաև սիրիական իրադարձությունների հետ կապված: «Ադրբեջանում ճնշումները գնալով ուժեղանում են, և դա անհանգստացնում է Ալիևին»,-նշեց նա: