Մինչ Հայաստանում թափ է հավաքում ապրիլյան վարչապետական տոտալիզատորը, Ռուսաստանում իր եզրագծին է մոտենում մարտին կայանալիք նախագահի ընտրությունը: Այստեղ անշուշտ չկա որևէ ինտրիգ, և Պուտինի վերընտրությունը կասկած չի հարուցում, սակայն դա ամենևին չի նշանակում ինտրիգի ընդհանրապես բացակայություն:
Ինտրիգը պարզապես ոչ թե ընտրությանն է, այլ ընտրությունից հետո, մասնավորապես առ այն, թե ի՞նչ փոփոխություն է անելու Պուտինը ՌԴ իշխանության համակարգում: Տեղի ունենալո՞ւ է Պուտինին մոտ և հեռու ուժերի վերադասավորում և հարաբերակցության փոփոխություն, կարևոր պաշտոնների առանցքային փոփոխություն՝ վարչապետ, պաշտպանության նախարար, արտաքին գործերի նախարար, հատուկ ծառայությունների ղեկավարություն, թե՞ ոչ: Իսկ ինչպիսի՞ հարաբերություն է լինելու նավթագազային երկու հսկաների՝ «Գազպրոմ»-ի և «Ռոսնեֆտ»-ի միջև:
Այս ամենը Հայաստանից ֆիզիկական տարածությամբ հեռու թվացող հարցեր են, սակայն տնտեսաքաղաքական տարածության առումով դրանք իհարկե անմիջականորեն առնչվում են Հայաստանին, և խոշոր հաշվով այդ իրողությունները, դրանց տանող տենդենցները ռեալ պոլիտիկի ռեժիմում անխուսափելիորեն իրենց ազդեցությունն են թողնելու թե՛ կովկասյան տարածաշրջանի, թե՛ Հայաստանի վրա անմիջականորեն, որը կովկասյան տարածաշրջանում ռուսական ազդեցության գոտու միակ պետությունն է:
Ըստ այդմ, նույնիսկ հարաբերականորեն հնարավոր է ասել, որ Հայաստանի իշխանության բուն հարցը ավելի մեծ մասով վճռվելու է Ռուսաստանի իշխանության մեջ հնարավոր վերանայումների արդյունքում, քան Հայաստանում՝ նշանակումների: Ընդ որում, այս իմաստով հետաքրքրական է նաև «Կրեմլի ցուցակի» հանգամանքը, որ Վաշինգտոնը «կախեց» ՌԴ նախագահական ընտրություններից առաջ, և որը նույնպես ունենալու է իր առանցքային ազդեցությունը ռուսական ներքին հնարավոր խմորումների և ուժերի հարաբերակցության փոփոխությունների վրա:
Եվ եթե դրան ավելացնենք նաև այն, որ նույն այդ օրերին ԱՄՆ-ում տեղի են ունեցել ՌԴ հատուկ ծառայությունների ղեկավարների հանդիպումները Նահանգների գործընկերների հետ, ապա ամբողջական է դառնում բավականին ընդգրկուն խաղի պատկերը, որի շրջանակում է կամա թե ակամա գտնվելու Հայաստանի իշխանության խաղը, ու նաև հենց այդ առումով է, որ փոքրիշատե տարակուսելի է թվում, երբ Հայաստանում անվերապահ հայտարարություններ են հնչում խաղի հայաստանյան ելքի վերաբերյալ: