Այսօր Ստեփանակերտում կազմակերպվել է տոնական երթ և հանրահավաք՝ նվիրված Արցախյան շարժման 30-ամյակին: Երթի մասնակիցները պաստառներով, դրոշներով, կոչերով, «Միացում» վանկարկելով, մայրաքաղաքի կենտրոնական փողոցներով շարժվել են դեպի Ստեփանակերտի Վերածննդի հրապարակ, որտեղ էլ կայացել է Ղարաբաղյան շարժման 30-ամյակին նվիրված տոնական միջոցառում: Միջոցառումը կազմակերպված է եղել պետական մակարդակով. ոգեշնչման խոսք է ասել նախագահ Բակո Սահակյանը:
88-ի շարժման արցախյան արժևորման ֆոնին խիստ ուշագրավ ու նաև անտրամաբանական է թվում Հայաստանի իշխանությունների լռությունը, մանավանդ, որ 1988-ի փետրվարի 20-ից հենց Երևանի Ազատության հրապարակն է դարձել համազգային շարժման կենտրոնը: Համենայնդեպս, մինչ այս պահը հայտնի չէ փետրվարի 20-ին անցկացվելիք պետական որևէ միջոցառման մասին: Տեղյակ ենք միայն, որ այդ օրն Ազատության հրապարակում օրվա խորհրդին նվիրված հանրահավաք է անցկացնելու Լևոն Տեր-Պետրոսյանի ՀԱԿ-ը:
Ի դեպ, շարժման 30-րդ տարեդարձի առթիվ «Հայաստանի Հանրապետություն» օրաթերթում ծավալուն հարցազրույց է տվել «Ղարաբաղ» կոմիտեի կոորդինատոր, Հայաստանի առաջին վարչապետ Վազգեն Մանուկյանը:
Համազգային շարժման ղեկավարներից մեկը խոսել է «Ղարաբաղ» կոմիտեի ղեկավարած շարժման արձանագրած երեք հեղափոխության մասին:
«Բոլոր այդպիսի՝ անկախության համար շարժումները, երբ որ դու կախյալ վիճակից հասնում ես անկախ վիճակի, համարվում էին հեղափոխական: Մենք ևս նման վիճակից հասանք անկախության: Հետևաբար, այդ հեղափոխություն ասվածը որոշակի առումով կար»,- ասել է Վազգեն Մանուկյանը` թերևս արձանագրելով, որ Երրորդ հանրապետության ծնունդը համազգային շարժման ամենամեծ ձեռքբերումն է:
Երկրորդ հեղափոխություն Վազգեն Մանուկյանը համարում է պետական կառուցվածքի փոփոխությունը, երբ Հայաստանը տոտալիտար, ավտորիտար ռեժիմից անցավ ժողովրդավարական կառավարման: Այս դեպքում` ցավոք, պետք է արձանագրենք հակահեղափոխության շատ արագ հաղթանակը, որովհետև 90-ականների կեսերից Հայաստանում տեղի է ունենում ժողովրդավարության գահավիժում, ինչը ներկայումս հանգեցրել է նույնիսկ, այսպես կոչված, սովետական կառավարման ռեստավրացիային:
Վազգեն Մանուկյանի նշած երրորդ հեղափոխությունը` կոմունիստական, սոցիալիստական համակարգից անցումը ազատ տնտեսական, շուկայական համակարգի, ձախողված է համարում անգամ Վազգեն Մանուկյանը: «Այդտեղ սայթաքեցինք թե՛ մենք, թե՛ ողջ հետխորհրդային տարածքը, և ամբողջությամբ չստացվեց այն, ինչ ուզում էինք»,- ասել է «Ղարաբաղ» կոմիտեի կոորդինատորը: Այնքան էլ պարզ է, թե կոնկրետ ինչ սայթաքումների մասին է խոսում Մանուկյանը, սակայն փաստն այն է, որ 90-ականների բարեփոխումները չունեցան ինստիտուցիոնալ բնույթ, ինչի հետևանքով այսօր Հայաստանում ձևավորվել է օլիգոպոլ համակարգ:
Նույնիսկ Վազգեն Մանուկյանի հարցազրույցից հստակ կարծիք է ձևավորվում, որ Հայաստանը վաղուց շեղվել է 88-ի հունից և արդիականացման նոր անհրաժեշտություն ունի:
Ի դեպ, այսօր Վազգեն Մանուկյանի ծննդյան օրն է: Շնորհավորում ենք համազգային շարժման ղեկավարներից մեկին` մաղթելով առողջություն և հաջողություններ:
Լուսանկարը` Վ. Մանուկյանի կայքից:
