«Կովկաս» ինստիտուտի նախագահ, քաղաքագետ Ալեքսանդր Իսկանդարյանի կարծիքով՝ Ադրբեջանում արտահերթ ընտրություններ անցկացնելու Իլհամ Ալիևի որոշումը առնչություն չունի Ղարաբաղյան հիմնահարցի հետ. «Դա կապված է Ադրբեջանի տնտեսության վիճակի հետ։ Ընդհանուր առմամբ վերջին ամիսների ընթացքում տնտեսության վիճակը կայուն է։ Նավթի գներն այժմ անկում են ապրում, Ադրբեջանի էլիտան կարծում է, որ ամռանը հնարավոր է՝ տնտեսական բարդություններ առաջանան։ Ես տնտեսագետ չեմ, չեմ կարող կոնկրետ նշել, թե ինչ խնդիրներ կառաջանան, բայց եթե, օրինակ, լինի մանաթի դևոլվացիա կամ նման մի բան, ապա, իհարկե, դա կանդրադառնա համակարգին սոցիալական աջակցությանը»,-«Առաջին լրատվական»-ի հետ զրույցում ասաց Ալեքսանդր Իսկանդարյանը։
Ադրբեջանի արտգործնախարարության խոսնակ Հիքմեթ Հաջիևը հայտարարել է, որ Մինսկի խմբի համանախագահների հետ հանդիպմանը պայմանավորվածություն է ձեռք բերվել Ղարաբաղյան կարգավորման ինտենսիվ բանակցությունները շարունակել Ադրբեջանում և Հայաստանում նախագահական ընտրություններից հետո: Մեկնաբանելով Հաջիևի այս հայտարարությունը՝ Ալեքսանդր Իսկանդարյանն ասաց. «Դա ուրիշ բանի մասին է խոսում. մենք տեսնում ենք, որ 2016-ի ապրիլյան էսկալացիայից հետո հաջողվեց վերագործարկել Մինսկի խումբը։ Բայց Մինսկի խումբն առաջվանը չէ, կարգավորմամբ չի զբաղվում, ընդամենը մենեջմենթով է զբաղված։ Ուստի պետք է համանախագահների կողմից երբեմն ճնշումներ լինեն կողմերի վրա՝ հանդիպումներ անցկացնելու համար։ Եվ հիմնականում այդ ճնշումը բանեցվում է Ադրբեջանի վրա։ Բայց կրկնում եմ՝ Մինսկի խումբը կարգավորմամբ վաղուց արդեն չի զբաղվում»։
Հայաստանում ստեղծվել է մի մթնոլորտ, որ շատերը Սերժ Սարգսյանի հնարավոր վարչապետությունը հիմնավորում են հենց Ղարաբաղյան հարցով ու նշում, որ նա է միակ մարդը, որ կարող է բանակցել Ալիևի հետ. «Ես վստահ չեմ, որ հենց Սերժ Սարգսյանն է վարչապետ դառնալու։ Հստակ հասկանում եմ, որ ՀՀԿ-ում կան մեծ քանակությամբ մարդիկ, որոնց ձեռնտու չէ, որ Սերժ Սարգսյանը չլինի։ Այդ մարդիկ հնարավոր է նման բամբասանքներ տարածեն, բայց քաղաքագետին այդ բամբասանքները միայն խանգարում են։ Եթե այդ որոշման մասին ինչ-որ մեկը գիտի, ապա մաքսիմում՝ 4-5 մարդ, եթե ոչ՝ 1-ը։ Մնացածին ես չեմ հավատում։ Ինչ վերաբերում է կոնկրետ Սերժ Սարգսյանին, ապա նա բավականին գրագետ է պատասխանում իր ապագային վերաբերող հարցերին և այդպես կանի մինչև մարտի վերջ ու ապրիլի սկիզբ։ Եթե հիմա հայտարարվի, ապա այդ մարդուն առանց կարագի մինչև ապրիլ կուտեն ձեր քույր ու եղբայր լրագրողները»,- ասաց Իսկանդարյանը։
Հարցազրույցն ամբողջությամբ՝ տեսանյութում: