ԼՂՀ նախկին արտգործնախարար Արման Մելիքյանը կարծում է, որ Հայաստանի իշխանությունների որակի խնդրից է, որ ռուս սահմանապահներին հայ-իրանական, հայ-թուրքական սահմանից, «Զվարթնոց» օդանավակայանից դուրս բերելու գործընթաց չի մեկնարկում։
«Երբ տեսնում ենք, թե ռուս սահմանապահների դուրսբերման խնդրի հետ կապված ինչպիսի փոթորիկ է բարձրացել ռուսական ԶԼՄ-ներում, և ինչպես են մեր պաշտոնյաները սուսուփուս քաշվել անկյունները, լռում և ձայն չեն հանում, սա ցուցանիշն է այն բանի, որ անվտանգության ոլորտի դաշնակցային հարաբերություններում այնպես չէ, ինչպես պետք է լինի, որովհետև անհեթեթություն է, երբ խնդրի նկատմամբ շատ ավելի ակտիվ դիրքորոշում են հայտնում ռուսական ԶԼՄ-ները, քան հայ պաշտոնատար անձինք, որոնց է իրականում մեր հայտարարությունը ուղղված, հասցեագրված եղել»,- շեշտեց նա։
Արման Մելիքյանը ընդգծեց, որ թիվ մեկ նպատակ պիտի լինի այսօր իշխանության որակը փոխելը. փաստացի գործ ունենք դե ֆակտո իշխանության հետ, որը պետականության ոչնչացման համար լավագույն նախադրյալներից մեկն է, լեգալ չէ, դրսում է հովանավորներ փնտրում, ինչը օգտագործվում է արտաքին ուժերի կողմից։
«Մեզ համար խնդիր է Հայաստանում թեկուզ հասարակական այն առանցքը ստեղծել, որը կկարողանա երկրի ինքնիշխանությունը առաջ մղելու խնդիրը լուծել»,- շեշտեց նա։
Մեր զրուցակիցը կարծում է, որ որքան էլ փորձի Սերժ Սարգսյանը անվտանգության հայեցակարգ փոխել, միևնույն է՝ դա հավելյալ արժեք չի կարող ունենալ, պետք է հասարակության հետ երկխոսության նստել։ Արման Մելիքյանը կարծում է, որ եթե Սերժ Սարգսյանը, հակառակ իր խոստման, ստանձնի վարչապետի պաշտոնը, դա կխորացնի անվստահությունը պետական ինստիտուտների, իր նկատմամբ, ինչը ընդհանուր առմամբ հարված է նաև մեր պետականությանը, անվտանգությանը։
«Կեղծ իշխանավորին իշխանության պահելու իրական ազդակ որևէ մեկը չի կարող ունենալ Հայաստանում՝ բացի նրանցից, ովքեր դրանից անձնական օգուտներ կարող են ունենալ նյութական մակարդակում»,- ընդգծեց Արման Մելիքյանը։
Մանրամասները՝ տեսանյութում: