Վրաստանի Սննդամթերքի հարցերով ազգային գործակալությունը սահմանափակումներ է մտցնում ֆիզիկական անձանց կողմից համեմունքների արտադրության և իրացման ոլորտում։ Այս մասին հայտնում է «Գրուզիա Օնլայնը»։
Ֆիզիկական անձինք կկարողանան համեմունքներ վաճառել միայն այն դեպքում, եթե դրանք մանրացնեն ու բաղադրիչները խառնեն գնորդների ներկայությամբ:
Ինչ վերաբերում է իրավաբանական անձանց, ապա նրանք կարող են իրենց ապրանքը վաճառել այն դեպքում, եթե այն փաթեթավորված լինի Վրաստանի մակնշման կանոնների պահպանմամբ, որոնք նախատեսված են Վրաստանի օրենսդրությամբ:
Սահմանափակումները կառավարության որոշման մեջ անվանվել են ժամանակավոր միջոցառումներ՝ կապված վրացական շուկայում համեմունքների արտադրության, վերամշակման և տեղաբաշխման կառավարման ռիսկերի հետ։ Այդ միջոցառումները կգործեն 2 տարի։
Նման վերահսկողություն սահմանելու վերաբերյալ որոշումն ընդունվել էր այն բանից հետո, երբ անցած տարի Սննդամթերքի հարցերով գործակալությունը լաբորատոր հետազոտություն էր անցկացրել, որի արդյունքները մասնագետերի համար մտահոգիչ են եղել։
Համեմունքների 187 նմուշից 33-ում (18%) ի հայտ է բերվել կապարի բարձր պարունակություն։ Խախտումները 88% դեպքերում գրանցվել են ֆիզիկական անձանց արտադրանքում։
Օրգանիզմում կապարի նորմայի գերազանցումը կարող է հանգեցնել թունավորման։