Տևական ընդմջումից հետո Երևանի ընդհանուր իրավասության դատարանի Կենտրոն վարչական շրջանի տարածքում գտնվող մասնաշենքում Արմեն Բեկթաշյանի նախագահությամբ շարունակվեց Նորք-Մարաշի զինված խմբի գործով դատական քննությունը՝ ըստ մեղադրանքի՝ «ՀՀ իշխանությունը յուրացնելու, զավթելու նպատակով ստեղծված հանցավոր համագործակցության» 20 անդամների՝ Արթուր Վարդանյանի,Վահան Շիրխանյանի, Անտոն Դիկրան Թոթոնջյանի, Գառնիկ Մարգարյանի, Վլադիմիր Առաքելյանի, Խաչիկ Ավետիսյանի, Ավետիս Բարեյանի, Վաղինակ Ստեփանյանի, Արթուր Եղիազարյանի, Վահագն Սալնազարյանի, Արման Հայրապետյանի, Էդվարդ Ներսիսյանի, Հարություն Սարիբեկյանի, Արա Պողոսյանի, Տիգրան Բոյաջյանի, Գևորգ Ջնդոյանի, Արկադի Մարդոյանի, Ասյա Մկրտչյանի, Մարինե Կաթանյանի, Նելլի Մինասյանի վերաբերյալ:
Հունվար ամսին ամբաստանյալ Նելլի Մինասյանը ծննդաբերել, աղջիկ է ունեցել: Դատական այս նիստին Նելլի Մինասյանը ներկայացել էր դատարան:
Դատական նիստը շատ երկար չտևեց:
Փաստաբան Սիրուշ Աղվանյանը հանդես եկավ միջնորդությամբ՝ պահանջելով դադարեցնել իր պաշտպանյալներ Արթուր Վարդանյանի ու Հայր Անտոնի՝ Անտոն Թոթոնջյանի քրեական հետապնդումը:
Պաշտպանի հիմնավորումն այն էր, որ գործի քննությունը ՀՀ ԱԱԾ քննչական վարչությանը հանձնարարվել է օրենքի խախտմամբ՝ որպես գլխավոր դատախազ ստորագրել է գլխավոր դատախազի տեղակալը: Իրենք փաստաբանական հարցում են կատարել, ինչին ի պատասխան ՀՀ գլխավոր դատախազությունից պատասխանել են, որ գլխավոր դատախազի տեղակալ Արմեն Հարությունյանը տվյալ ժամանակահատվածում չի եղել ՀՀ գլխավոր դատախազի պաշտոնակատար:
Փաստաբանը նշեց, որ հիշյալ խախտման հետ կապված՝ իրենք դիմել են ՀՀ գլխավոր դատախազին, որ քրեական գործ հարուցվի:
Վահան Շիրխանյանի շահերի պաշտպան, փաստաբան Հայկ Ալումյանը ժամանակ խնդրեց միջնորդությանը ծանոթանալու համար: Ծանոթանալուց հետո նա ասաց, թե միանում է Սիրուշ Աղվանյանի միջնորդությանը, այն հիմնավոր է, վերաբերում է ոչ միայն Սիրուշ Աղվանյանի պաշտպանյալներին, այլ ամբողջ գործին, քանի որ դրա քննությունը ԱԱԾ քննչական վարչությանը հանձնարարվել է օրենքի պահանջի խախտմամբ:
Դատարանը պաշտպանից պահանջեց ներկայացնել փաստաբանական հարցման իրենց գրությունը: Դատարանն իր հերթին կդիմի ՀՀ գլխավոր դատախազություն՝ պարզելու, թե նշված ժամանակահատվածում գլխավոր դատախազի տեղակալ Արմեն Հարությունյանը եղե՞լ է գլխավոր դատախազի պաշտոնակատար: Սիրուշ Աղվանյանի միջնորդության հետագա քննարկումը հետաձգվեց, այն կշարունակվի հաջորդ դատական նիստում:
Դատարանը քննարկեց ամբաստանյալ Վաղինակ Ստեփանյանի պաշտպանի հարցը: Այս ամբաստանյալին նախաքննության ընթացքում ու դատարանում մինչ այժմ պաշտպանում էր հանրային պաշտպան Լյուդվիգ Ավետիսյանը: Բայց դատական նախորդ նիստին հայտնի դարձավ, որ հանրային պաշտպանի գրասենյակի ղեկավարի որոշմամբ՝ Լյուդվիգ Ավետիսյանն այլևս չի պաշտպանելու Վաղինակ Ստեփանյանի շահերը՝ այլ գործերով ծանրաբեռնված լինելու պատճառով: Գրասենյակի ղեկավարը Լյուդվիգ Ավետիսյանի փոխարեն Վաղինակ Ստեփանյանի շահերի պաշտպան էր նշանակել մեկ այլ հանրային պաշտպանի՝ Անժելիկա Հակոբյանին:
Նախորդ դատական նիստում ամբաստանյալ Վաղինակ Ստեփանյանը հայտարարել էր, թե չի ցանկանում օգտվել Անժելիկա Հակոբյանի ծառայություններից, պահանջում է, որ իր շահերի պաշտպանությունը կրկին ստանձնի Լյուդվիգ Ավետիսյանը:
Հանրային պաշտպանի գրասենյակի ղեկավարը իր որոշումը չէր փոխել:
Այս դատական նիստում ամբաստանյալ Վաղինակ Ստեփանյանը դարձյալ հրաժարվեց կոնկրետ Անժելիկա Հակոբյանի ծառայություններից, ասաց, թե անձամբ այդ պաշտպանի դեմ ոչինչ չունի, բայց ցանկանում է, որ իր շահերը պաշտպանի… տղամա՛րդ հանրային պաշտպան:
Հանրային պաշտպան Անժելիկա Հակոբյանն էլ նշեց, որ նախորդ նիստին Վաղինակ Ստեփանյանը հրաժարվել էր իր ծառայություններից, ինքն էլ գործի՝ նրա մասի վարույթը հանձնել է գրասենյակ, և տվյալ պահին չունի նաև հանրային պաշտպանի գրասենյակի ղեկավարի որոշումը:
Փաստաբան Հայկ Ալումյանը նշեց, որ պաշտպանության իրավունքը պատրանքային իրավունք չէ: Չի կարելի համարել, որ փաստաբանը որևէ մեկի իրական պաշտպանն է, եթե տվյալ անձը տվյալ փաստաբանի հետ ոչ մի անգամ առանձնատեսակցություն չի ունեցել, մարտավարություն չի մշակել: Պետությունը պատասխանատու է հանրային պաշտպանի ծառայություններից օգտվողների պաշտպանության որակի համար:
Ամբաստանյալ Վաղինակ Ստեփանյանը մեկ անգամ ևս հրաժարվեց հանրային պաշտպան Անժելիկա Հակոբյանի ծառայություններից ու պնդեց, որ իրեն տղամարդ հանրային պաշտպան է պետք…
Դատարանը կդիմի հանրային պաշտպանի գրասենյակ՝ այս խնդիրը մեկ անգամ ևս պարզելու նպատակով:
Այսքանով դատական այս նիստը եզրափակվեց:
Հիշեցնենք, որ ըստ մեղադրանքի՝ հանցավոր «համագործակցությունը, կազմակերպված խումբը» ստեղծել ու ղեկավարել է Արթուր Վարդանյանը:
Խմբի կազմում ապօրինի կերպով ձեռք են բերվել զենք, ռազմամթերք, պայթուցիկ նյութեր, սարքեր՝ ՀՀ իշխանությունը բռնությամբ զավթելու նպատակով, սակայն 2015 թվականի նոյեմբերի 25-ին ՀՀ ազգային անվտանգության ծառայության աշխատակիցները վնասազերծել են բացահայտված խմբի անդամներին:
Հայր Անտոնը՝ «Ռադիո Մարիամ» մշակութային հիմնադրամի տնօրեն, Գյումրու Կաթոլիկե եկեղեցու քահանա, ՀՀ և Ավստրալիայի քաղաքացի Անտոն Դիկար Թոթոնջյանը, ըստ մեղադրանքի՝ 2015 թվականի ապրիլից «անձնապես» ծանոթացել է Իսպանիայից Հայաստան ժամանած Արթուր Վարդանյանի հետ, մասնակցել է վերջինիս ստեղծած հանցավոր «համագործակցությանը»՝ ֆինանսավորելով այն:
Ըստ մեղադրանքի՝ Վահան Շիրխանյանը 2015 թվականի մայիսից «անձնապես» ծանոթանալով Հայր Անտոնի, Իսպանիայից ժամանած Արթուր Վարդանյանի հետ, նրանց առաջարկությամբ ստանձնել է մասնակցել վերջինիս ստեղծած հանցավոր համագործակցությանը…
Ամբաստանյալներին մեղադրանք է առաջադրված ՀՀ քրեական օրենսգրքի 223 հոդվածի 2-րդ, 235 հոդվածի 3-րդ, 35-300 հոդվածի 1-ին մասերով:
