Հայաստանի Հանրապետությունում 2017 թվականին պաշտոնապես արձանագրվել է սպանության 49 դեպք, որը 17-ով կամ 25 տոկոսով պակաս է 2016 թվականի համեմատ: Փետրվարի 9-ին լրագրողների լրագրողների հետ այս մասին ասաց ՀՀ գլխավոր դատախազ Արթուր Դավթյանը:
«49 սպանության դեպքերից 6-ը վերաբերվում է անձանց անհայտ կորելու փաստով հարուցված քրեական գործերով: Այդ 6 գործերը կարող են կարճվել հետագայում անհայտ կորած անձին հայտնաբերման արդյունքում»,- ասաց Դավթյանը:
Նրա խոսքով` սպանությունների ամենաբարձր ցուցանիշը արձանագրվել է 1992 թվականին 305 սպանություն, 1992 թվականից մինչև 1997 թվականը արձանագրվել են եռանիշ թվերով սպանության դեպքեր:
«1998 թվականից սկսած բացառությամբ առանձին տարիների նվազման միտում է արձանագրվել: Հայաստանում 2017 թվականին սպանությունների դեպքերը 100 հազար բնակչի հաշվով կազմում է 1.6 դեպք:
Համեմատության համար ասեմ, որ Լատվիայում այդ թիվը կազմում է 2.87, Լիտվայում՝ 4.46, Ռուսաստանում՝ 6.76, իսկ Բելառուսում՝ 2.45»,- ասաց ՀՀ գլխավոր դատախազը:
Արթուր Դավթյանը հայտնեց նաև, որ Հայաստանում էապես նվազել են հրազենի և ռազմամթերքի գործադրմամբ կատարված հանցագործությունները:
«Եթե 2016 թվականին 69 այդպիսի դեպք է արձանագրվել , ապա 2017 թվականին` 52: Իսկ եթե համեմատենք 10 տարի առաջվա տվյալների հետ, ապա կրկնակի նվազել են նման դեպքերը: Համեմատության համար նշեմ, որ 2007 թվականին հրազենային գործադրմամբ հանցագործության 106 դեպք է արձանագրվել»,- նշեց ՀՀ գլխավոր դատախազը: