«Ես փաստաթղթերի իսկությանը տեղյակ չեմ և կարծում եմ, որ պարոն Սարգսյանը հանդես կգա համապատասխան պարզաբանումներով»,-«Առաջին լրատվական»-ի հետ զրույցում ասաց Արդարադատության նախարար Դավիթ Հարությունյանը՝ անդրադառնալով «Հետք» էլէկտրոնային պարբերականի հրապարակմանը։
Նշենք, որ «Հետք»-ը գրել էր, որ Բրիտանական ընկերությունների Companies House ռեգիստրում գրանցված Eurasia House International ընկերության փաստաթղթերում Արմեն Սարգսյանը ներկայանում է որպես Բրիտանիայի քաղաքացի: Նա այս ընկերության տնօրեններից մեկն է եղել:
Իսկ ՀՀ 4-րդ նախագահին Սահմանադրությամբ ներկայացվող պահանջներից մեկը վերջին 6 տարում միայն ՀՀ քաղաքացի լինելու հանգամանքն է: Արդյո՞ք Արմեն Սարգսյանը համապատասխանում է այս պահանջին՝ հարցրինք Դավիթ Հարությունյանը պատասխանեց.«Եեթ չեմ սխալվում ՀՀԿ խմբակցությունը եռևս չի առաջադրել նրա թեկնածությունը։ Այնպես որ դեռևս ժամանակ կա և պարոն Սարգսյանը ինքը կանդրադառնա այդ հարցերին»։
Արմեն Սարգսյանի գրասենյակի հանրային կապերի աշխատանքը համակարգող Հասմիկ Պետրոսյանը «Հետք»-ին ասաց, որ Սարգսյանը երկքաղաքացի է եղել 2002-2011թթ.: Դրանից հետո նա հրաժարվել է Մեծ Բրիտանիայի քաղաքացիությունից և հանդիսանում է միայն Հայաստանի քաղաքացի: Մինչդեռ բրիտանական ընկերությունների ռեգիստրում հրապարակված փաստաթղթերը կասկածի տակ են առնում այս տեղեկությունը:
Սարգսյանը Eurasia House International-ի տնօրեն է նշանակվել 2002թ-ին: Այդ ժամանակ նա գրանցվել է որպես Հայաստանի քաղաքացի, սակայն 2005-ից վեր, ընկերության բոլոր տարեկան փաստաթղթերում Սարգսյանը ներկայանում է որպես Բրիտանիայի քաղաքացի: Վերջին տարեկան փաստաթուղթը հրապարակվել է 2014թ-ին: Հաջորդ տարում ընկերությունը լուծարվել է և այլ հաշվետվություններ հրապարակված չեն: Այսինքն, ինչպես վկայում են բրիտանական ռեգիստրի փաստաթղթերը, դեռ 4 տարի առաջ Արմեն Սարգսյանը ընկերության հաշվետվություններում ներկայացել է Բրիտանիայի քաղաքացի:
