Սերժ Սարգսյանի կողմից Հայաստանի չորրորդ նախագահի թեկնածու առաջադրված Արմեն Սարգսյանը եվրոպական էիտար սրահներից վերջապես կվերադառնա Երևան, որտեղ այսօր նա հանդիպումներ կունենա ընդդիմադիր «Ելք» և «Ծառուկյան» դաշինքների հետ: «Ելքի» հետ հանդիպումն ավելի շատ քաղաքվարական, արարողակարգային բնույթ է կրում, որովհետև խմբակցության պատգամավոր Էդմոն Մարուքյանը երեկ վերահաստատել է, որ այդ հանդիպումը չի փոխելու իրենց դիրքորոշումը․ ինչպես նախապես հայտարարել էին, «Ելք»-ը դեմ է քվեարկելու Արմեն Սարգսյանի թեկնածությանը:
Շատ ավելի կարևոր է Արմեն Սարգսյանի հանդիպումը «Ծառուկյան» խմբակցության հետ, որովհետև կոալիցիայի 65 ձայները չեն բավարարում, որ ՀՀԿ թեկնածուն ընտրվի քվեարկության առաջին փուլով. Արմեն Սարգսյանին պետք է Ծառուկյանի թիմի աջակցությունը կամ գոնե այդ խմբակցության 14 պատգամավորների քվեները: Լավատեղյակ աղբյուրները նշում են, որ «Ծառուկյան» դաշինքը կողմ է քվեարկելու Սարգսյանին, ընդ որում` դա անելու է ոչ թե ազատ ռեժիմով, այլ` պաշտոնական, միասնական տեսակետով: Ուշագրավ է «Ծառուկյան» խմբակցության հետ հանդիպման ձևաչափը։ Հայտնի է դարձել, որ հանդիպումը խմբակցության ղեկավարի և պատգամավորների հետ տեղի կունենա առանձին-առանձին։
Նախ Արմեն Սարգսյանը կհանդիպի Գագիկ Ծառուկյանի, հետո արդեն՝ խմբակցության պատգամավորների հետ։ Նման ձևաչափը պատահական չէ ընտրված և, ըստ էության, մարտավարական քայլ է, որը հանրության մոտ տպավորություն է ձևավորելու, թե ֆորմալ առումով ընդդիմադիր կուսակցությունը Սարգսյանին կողմ է քվեարկելու ոչ թե իշխանության միջամտության կամ արտաքին գործոնների հետևանքով, այլ այն բանի արդյունքում, որ առանձնազրույցի ընթացքում Արմեն Սարգսյանը կարողացել է համոզել Գագիկ Ծառուկյանին կամ նույնիսկ համաձայնել է նրա առաջ քաշած նախապայմաններին: Կարճ ասած` վաղը տպավորություն է ստեղծվելու, որ «Ծառուկյան» խմբակցությունում միակ «ասողը» հենց Գագիկ Ծառուկյանն է:
Ի դեպ, վերջինիս և նրա միջոցով խմբակցության սուբյեկտության ամրագրումը Սերժ Սարգսյանի քաղաքական ծրագրի կարևոր բաղադրիչ է: Կառավարման այս համակարգում նախագահական ընտրություններն ինքնին կարևոր, շրջադարձային իրադարձություն չեն, սակայն դրանց միջոցով Սերժ Սարգսյանը փորձարկելու է «ընդարձակ մեծամասնության» բանաձևը, որն ընկած է լինելու Սերժ Սարգսյանի նոր իշխանության ձևավորման հիմքում, լինելու է նրա քաղաքական լեգիտիմության բանալին, համակարգային նոր ստատուս-քվոյի խորհրդարանական դրսևորումը: «Ընդարձակ մեծամասնությունը» խորհրդարանական ֆորմալ մեծամասնության բանաձև չէ, դա մոտավորապես «ազգային համաձայնության իշխանության» այն մոդելն է, որի մասին Սերժ Սարգսյանը խոսել էր դեռ 2016-ի օգոստոսին` ՊՊԾ գնդի դրամատիկ իրադարձություններից անմիջապես հետո: «Ընդարձակ մեծամասնության» մոդելի առաջին փորձարկումը տեղի կունենա վաղը` Արմեն Սարգսյան-Գագիկ Ծառուկյան հանդիպումով, որից հետո կհայտարարվի, որ «Ծառուկյան դաշինքը» սատարում է Արմեն Սարգսյանի թեկնածությունը:
Ստեղծվում է այն նախադեպը, հիմքը, որի հիման վրա ընդամենը երկու ամիս անց ձևավորելու է Սերժ Սարգսյանի «ազգային համաձայնության» կառավարությունը` խորհրդարանի ինստիտուցիոնալ նսեմացման ֆոնին, երբ ակնհայտ կդառնա, որ «պատկառելի ընդդիմություն» ունեցող խորհրդարանն ունի լավագույն դեպքում մեկ տասնյակ ընդդիմադիր պատգամավոր:
