Կստացվի՞ ՀՅԴ-Ծառուկյան դաշինք գործակցություն ռեյտինգային ընտրակարգի վերանայման խնդրում, և կկարողանա՞ն նրանք ՀՀԿ-ին բերել առարկայական քննարկման ու փոփոխության դաշտ: Ներկայումս այդ հարցադրումը հնչում է հռետորական, քանի որ համենայն դեպս դիրքային առումով Հանրապետականը մեծ կախվածություն չունի այդ երկու ուժերից: Մյուս կողմից, ամենևին պատահական չէ, որ ՀՅԴ-ն ու Ծառուկյան դաշինքը հենց այժմ են բարձրացնում հարցը, թեև շատերը այդ կապակցությամբ հարցնում են, թե ինչու՞ այժմ՝ ընտրությունից ընդամենը ութ-իննը ամիս անց, երբ հաջորդ ընտրությանը կա դեռևս չորս տարի: Խնդիրն այն է, որ ՀՀԿ-ն խոշոր հաշվով հենց այժմ ունի ՀՅԴ-ի ու Ծառուկյան դաշինքի կարիքը և հենց այս ժամանակահատվածն է, որ այդ երկու ուժերը կարող են քիչ թե շատ ազդեցություն ունենալ այդ իմաստով:
Բանն այն է, որ իշխանության ձևավորման, վերադասավորման, վերախմբավորման գործընթացը մտել է եզրափակիչ փուլ, կամ նախագահի ընտրության, վարչապետի, կառավարության նշանակման հարց: Եթե ՀՀԿ-ն լիներ միատար, ապա այստեղ էլ հարց չէր լինի, սակայն ՀՀԿ-ն միատարր չէ և այդ առումով բաժանարար գծերը ավելի են ընդգծվելու, ներքին մրցակցությունն ավելի է սրվելու: Ըստ այդմ, ՀՀԿ ներքին թևերը, այդ թվում նաև նրանց կառավարելու և բալանս ապահովելու անհրաժեշտություն ունեցող Սերժ Սարգսյանը գործնականում կարող են կանգնել, և գուցե արդեն կանգնել են ՀՅԴ ու Ծառուկյան դաշինքի այս կամ այն դրսևորումով աջակցությունն ունենալու խնդրի առաջ: Ավելին, նախագահի ընտրության հարցում Սերժ Սարգսյանը պարզապես բաց տեքստով է հայտնել «ընդարձակ մեծամասնության» իր ակնկալիքը:
Ըստ այդմ, ներկայիս ժամանակահատվածը՝ մինչև թերևս ապրիլ, կամ առավելագույնը մայիս, թե ՀՅԴ-ի, թե Ծառուկյան դաշինքի համար ՀՀԿ-ին որևէ փոխզիջման բերելու թերևս ամենաօպտիմալ ժամանակահատվածն է, համենայն դեպս իրադարձությունների «պլանային» ընթացքի պայմաններում:
Դաշնակցությունն ու Ծառուկյանը փորձում են օգտագործել այդ ժամանակահատվածը ռեյտինգային ընտրակարգի հարցում պայմանավորվածությունների ձեռքբերման համար, իսկ գուցե նաև այդ առիթով այլ պայմանավորվածություններ քննարկելու համար, կապված ապրիլից հետո իրենց դիրքերի հետ:
Բանն այն է, որ ապրիլից հետո արդեն, եթե ՀՀԿ-ն բարեհաջող իրականացնի վերադասավորումն ու իշխանության ձևավորումը, առնվազն որոշակի ժամանակահատված ՀՀԿ հետ «խոսել չի լինի», քանի որ կլինեն կայացված նվազագույնը միջանկյալ համաձայնություններ՝ Սերժ Սարգսյանի վարչապետությամբ կամ առանց դրա՝ ՀՀԿ նախագահությամբ, և իրավիճակ թելադրողը ամբողջությամբ կլինի Հանրապետականը, ու այդ ժամանակ բավականին անկանխատեսելի է ՀՅԴ ու Ծառուկյան դաշինքի համար, թե ինչ կթելադրի ՀՀԿ-ն, և հատկապես որ թևը կլինի հիմնական թելադրողը: