Թեվիս Մաքգինն անցյալ տարի ընդունվեց Facebook-ում աշխատանքի: Նա հույս ուներ, որ զբաղվելու է կազմակերպության մարքեթինգային հետազոտություններով, սակայն դրա փոխարեն նրան հանձնարարեցին հետևել Մարկ Ցուկերբերգի իմիջին, որպեսզի պարզեն, թե ինչպես են մարդիկ վերաբերվում նրան:
Մաքգինը պետք է ամեն օր ստուգեր, թե ինչպես է փոխվում Ցուկերբերգի կերպարը, կախված այն բանից, թե ինչ հայտարարություններ է անում աշխարհում ամենամեծ սոցցանցի հիմնադիրը: Նման պաշտոններ կան խոշոր քաղաքական գործիչների շտաբերում, բայց խոշոր կազմակերպությունների բիզնեսմենները նման հետազոտություններ եթե իրականացնում էլ են, ապա ժամանակ առ ժամանակ և ոչ՝ մշտապես: Մաքգինի խոսքերով՝ Ցուկերբերգն ուզել է իմանալ, թե ինչպես է ընդունվում իր ցանկացած խոսք ու գործողություն:
«Facebook-ը՝ Մարկն է»,- ասում է Մաքգինը: Նա գտնում է, որ 33-ամյա գործարարը աննախադեպ իշխանություն ունի սոցցանցի 2 միլիարդանոց լսարանի վրա, ինչպիսին չունեն նույնիսկ նախագահները:
Աշխատելով Facebook-ում կես տարի՝ նա դուրս է եկել աշխատանքից, գիտակցելով, որ սոցիալական ցանցը միայն դեպի վատն է փոխում աշխարհը:
Իր հետազոտությունների արդյունքները Մաքգինը չի բացահայտել: Facebook-ում նույնպես չեն մեկնաբանել նրա աշխատանքի արդյուքները, միայն նշել են, որ կազմակերպությունը զբաղվում է Մարկ Ցուկերբերգի նկատմամբ օգտատերերի վերաբերմունքի մոնիտորինգով արդեն մոտ երկու տարի: