«Առաջինը՝ ցանկացած դիկտատորական ռեժիմներում գոյություն ունեն ներիշխանական խնդիրներ և երկրորդ ամենակարևոր գործոնը՝ արտաքին տենդենցներն են․ տարածաշրջանում կատարվում են լրջագույն խնդիրներ, որոնք Ադրբեջանին այս կամ այն կերպ վերաբերում են՝ առաջինը հենց Թուրքիայի բարդ վիճակն է, որը հիմնական հովանավորն է Ադրբեջանի»,-«Առաջին լրատվական»-ի հետ զրույցում շեշտեց Ռազմավարական և ազգային հետազոտությունների հայկական կենտրոնի ղեկավար, քաղաքագետ Մանվել Սարգսյանը՝ խոսելով ապրիլի 11-ին Ադրբեջանում նշանակված նախագահական արտահերթ ընտրություններ անցակցնելու պատճառների մասին։
Ըստ քաղաքագետի՝ Ադրբեջանի հիմնական մտահոգությունը կապված է տարածաշրջանային զարգացումների և անկայուն իրավիճակի հետ։
Ադրբեջանի ընդդիմադիր «Ժողովրդավարական ուժերի ազգային խորհուրդը» որոշել է բոյկոտել ապրիլի 11-ին կայանալիք արտահերթ նախագահական ընտրությունները և բողոքի ակցիաներ իրականացնել: Ինչպես նշել է «Ժողովրդավարական ուժերի ազգային խորհրդի» նախագահ Ջամիլ Հասանլին՝ այս ընթացքում երկրում տեղի չեն ունեցել իրադարձություններ, որոնք առաջացնեին արտահերթ ընտրությունների պահանջ:
Մանվել Սարգսյանը համոզված է, որ Ադրբեջանում չկա որևէ ընդդիմադիր ուժ, որը կարող է լուրջ հակակշիռ դառնալ ալիևյան ռեժիմին։
«Ադրբեջանը ծայրաստիճան միլիտարիզացված երկիր է, սարսափի մթնոլորտ կա այնտեղ և այլն․ իմ կարծիքով՝ նման վիճակում որևէ լուրջ շեղում Ալիևի պլաններից ՝ կարող է լինել միայն ու միայն արտաքին միջամտության դեպքում, բայց թերևս գոնե այս պահի դրությամբ՝ ես այդպիսի ազդակներ չեմ տեսնում, սակայն, եթե լինի այդպիսի միջամտություն, ապա այս ամենը կարող է շատ մեծ բարդություններ ստեղծել»,- ընդգծեց բանախոսը։
Հիշեցնենք, որ Ադրբեջանի նախագահ Իլհամ Ալիևը փետրվարի 5-ին ստորագրեց մի հրամանագիր, համաձայն որի 2018թ-ի ապրիլի 11-ին Ադրբեջանում նախագահական արտահերթ ընտրություններ են անցկացվելու: Մինչդեռ օրենքով նախատեսված կարգով՝ նախագահական ընտրություններն այնտեղ պետք է տեղի ունենային գալիք հոկտեմբերի 17-ին: Նշենք նաև, որ Ալիևի ստորագրած հրամանագրում որևէ բան նշված չէ այն մասին, թե որն է նման որոշման պատճառը:
Մանրամասները՝ տեսանյութում։
