«Քաղաքացիական դատավարության» օրենսգրքի նախագծում դատարանի կողմից փաստաբանի նկատմամբ տուգանք կիրառելու վերաբերյալ իրավակարգավորման անհրաժեշտություն չկա: Փետրվարի 7-ին փաստաբանների բողոքի ակցիայի շրջանակներում այս մասին ասաց ՀՀ փաստաբանների պալատի նախագահ Արա Զոհրաբյանը:
«Քաղաքացիական գործերով 2016 թվականին քննվել է մոտ 130 հազար գործ, միայն չորս փաստաբանի նկատմամբ է Փաստաբանների պալատում սանկցիա կիրառելու վերաբերյալ որոշում կայացվել, իսկ 2017 թվականին, երբ ավելի շատ գործեր էին քննվել, միայն այդպիսի երկու դեպք է արձանագրվել: Այդ պայմաններում չի կարող խոսք գնալ դատական տուգանք սահմանելու անհրաժեշտության մասին»,- ընդգծեց Զոհրաբյանը:
Նրա խոսքով` Դատական օրենսգրքի նախագծում գրված է, որ դատական տուգանքի մասին դրույթները գործելու են 2019 թվականի հունվարի 1-ից հետո:
«Եթե չունեք հրատապության խնդիր, ավելի լավ է հանգիստ քննարկումներով ինչ-որ լուծում գտնենք: Մենք կրկին կառուցողական ենք տրամադրված, ուստի պետք է ինչ-որ կոմպրոմիսային լուծման հասնենք»,- նշեց Զոհրաբյանը: