iPhone 8, iPhone 8 Plus և iPhone X սմարթֆոնների համար անհրաժեշտություն չի առաջանա արհեստականորեն դանդաղեցնել պրոցեսորի հաճախականությունը մարտկոցի «հնանալուն» պես, քանի որ դրանց թարմացված բաղադրիչները թույլ կտան խուսափել հանկարծակի անջատումներից և վերբեռնումներից։ Այս մասին հայտնել են Apple-ի ներկայացուցիչները՝ ի պատասխան սենատոր Ջոն Թյունի հարցի, ով ընկերություն էր ուղարկել նամակ՝ ցանկանալով իմանալ, թե չի՞ պատրաստվում ընկերությունը նոր սմարթֆոնների համար թողարկել պրոցեսորի աշխատանքը դանդաղեցնող ծրագրային ապահովում, ինչպես նախորդ մոդելներում։ Այս մասին փոխանցում է The Verge-ը։
Ընկերությունը ոչ մի երաշխիք չի տվել, որ «դանդաղեցնող» ծրագրային ապահովում չի թողարկվի նորույթների համար, սակայն նման հայտարարությունը թույլ է տալիս հասկանալ, որ եթե նույնիսկ 2017 թվականին արտադրված սմարթֆոնների աշխատանքը դանդաղի, դա այդքան նկատելի չի լինի, ինչպես նախորդ մոդելների պարագայում։
Հիշեցնենք, որ ավելի վաղ ընկերությունը խոստովանել էր, որ իջեցնում է iPhone-ի նախորդ սերունդների արտադրողականությունը՝ աշխատանքի ժամկետի երկարացման ու օգտատերերի հարմարավետության համար, սակայն օգտատերերը չեն գնահատել ընկերության «հոգատարությունը»։