ՌԴ ՊՆ-ն ցանկանում է պարզել հրթիռի տեսակը, որն օգտագործվել է Իդլիբ նահանգում ապստամբների կողմից ինքնաթիռի խոցման համար։
Ռուսական կողմը թուրքական իշխանություններին հայց է ուղղել Սու-25 գրոհիչի բեկորները ստանալու հարցում աջակցության վերաբերյալ։ Այս մասին հաղորդվում է ՌԴ ռազմական գերատեսչության ֆեյսբուքյան էջում։
«ՌԴ ՊՆ փորձագետների համար առանձնակի հետաքրքրություն են ներկայացնում հրթիռի կրակային ազդեցության հետքերով ռուսական գրոհիչի շարժիչների մնացորդները՝ ահաբեկիչների կողմից կիրառված շարժական զենիթա-հրթիռային համալիրի հստակ նույնականացան, դրա արտադրության վայրը պարզելու և դեպի Սիրիա մատակարարումների ուղիներն ի հայտ բերելու համար»,-ասվում է հաղորդագրությունում։
Սու-25-ը խոցվել է փետրվարի 3-ին։ Ինքնաթիռն այրվել էր օդում և վթարվել։ Օդաչու Ռոման Ֆիլիպովը կատապուլտով վայրէջք էր կատարել, սակայն վայրէջքից հետո մահացել։ ՌԴ ՊՆ-ն հայտնել է, որ օդաչուն ինքնապայթեցման է դիմել, որպեսզի գերի չընկնի։ Հարձակման պատասխանատվությունը ստանձնել է «Թահրիր ալ-Շամ» խմբավորումը։