ԱԺ նիստում երեկ խորհրդարանի փոխխոսնակ Միքայել Մելքումյանը տեղեկացրել է, որ իրենց դաշինքը կմիանա «Ելք» խմբակցության՝ Հարկային օրենսգրքում փոփոխություններ անելու հարցով արտահերթ նիստ հրավիրելու ստորագրահավաքին: «Չնայած լսումներ կազմակերպվեցին ԱԺ-ում, բայց կառավարությունը ձգձգում է լսումները և նույնիսկ կոսմետիկ լուծումները չի կատարում»,- ասել է նա՝ հավելելով, որ հարցադրումը շատ ճիշտ է: Սա գործող խորհրդարանում «Ելքի» և «Ծառուկյան» դաշինքի, ըստ էության, առաջին լուրջ համագործակցության դրսևորումն է:
Նախկինում «Ելքը» մի քանի անգամ հանդես է եկել նախաձեռնություններով, որոնք, ըստ էության, մերժվել են խորհրդարանական ֆորմալ առումով ամենամեծ ընդդիմադիր խմբակցության կողմից: Օրինակ` այս խորհրդարանի գործունեության մեկնարկին «Ծառուկյան» դաշինքը ԱԺ նախագահի ընտրություններում չպաշտպանեց «Ելքի» թեկնածու Էդմոն Մարուքյանի թեկնածությունը կամ հիմա չի աջակցում, որպեսզի «Ելքը» հնարավորություն ունենա սեփական թեկնածու ունենալ նախագահական ընտրություններում: Իհարկե, այս դեպքերի համար «Ծառուկյան» դաշինքը, իր առաջնորդի մակարդակով, տվել է ֆորմալ հիմնավորում` պնդելով, թե իրենք մտադիր չեն մասնակցել գործընթացի, որտեղ հաղթելու որևէ շանս չունեն: Նման դիրքորոշումը` մի կողմից, լրիվ տեղավորվում է Գագիկ Ծառուկյանի որդեգրած շատ սպեցիֆիկ քաղաքականության մեջ, մյուս կողմից` խոցելի է, որովհետև նույն տրամաբանությամբ Ծառուկյանը չպետք է մասնակցեր խորհրդարանական վերջին ընտրություններին, քանի որ դրանց հաղթողի հետ կապված կասկածներ չկային:
Քաղաքական գնահատականների մակարդակում ավելի հիմնավոր է հնչում այն տեսակետը, որ «Ծառուկյան» դաշինքը չի միանում «Ելքի» այն նախաձեռնություններին, որոնք հակոտնյա են Սերժ Սարգսյանի և Գագիկ Ծառուկյանի պայմանավորվածություններին կամ կասկածի տակ են դնում Սերժ Սարգսյանի այն ծրագրերի իրականացումը, որոնք ուղղված են համակարգային տրանսֆորմացիայի անցնում իրականացմանը:
Հարկային օրենսգրքում փոփոխություններ անելու հարցով արտահերթ նիստ հրավիրելու «Ելքի» նախաձեռնությունն, այսպես ասած, կասկածի տակ չի դնում Սերժ Սարգսյանի իշխանության քաղաքական հիմքերը և ավելի շատ ուղղված է Կարեն Կարապետյանի կառավարության դեմ, ինչի մասին թափանցիկ ակնարկ է արել նաև Միքայել Մելքումյանը:
Պատահական չէ, որ «Ծառուկյան» դաշինքը միանում է «Ելքի» պայքարի միայն խորհրդարանական հատվածին, որովհետև փողոցային գործընթացն իր մեջ միշտ անկանխատեսելիության բաղադրիչ է պարունակում: Նման օրակարգով արտահերթ նիստի անցկացումն օբյեկտիվորեն ձեռնտու է գրեթե բոլորին` բացառությամբ Կարեն Կարապետյանի, որի թիմի անօգնականությունն ակնհայտ էր թանկացումների թեմային նվիրված խորհրդարանական լսումների ժամանակ:
«Ելքը» արտահերթ նիստի պարագայում հնարավորություն է ստանում արձանագրել իր փողոցային պայքարի գոնե հարաբերական հաջողությունը, Կարեն Կարապետյանի կառավարությանը քննադատելը` կարելի է ասել, «բրենդային» թեմա է «Ծառուկյան» դաշինքի համար, ինչն, ըստ էության լուծում է քաղաքական այս ուժի ոչ միայն ֆորմալ ընդդիմության հարցը, այլ նաև ապահովում է նրա կենսունակությունը ներհամակարգային գործընթացներում: Թանկացումների թեմայով ԱԺ արտահերթ նիստի անցկացումը, ինչքան էլ տարօրինակ հնչի, ձեռնտու է նաև Սերժ Սարգսյանին:
Միևնույն է` Հարկային օրենսգրքում որևէ փոփոխություն, համենայն դեպս` նշանակալի, չի կատարվելու, սակայն արտահերթ նիստի ժամանակ «Ելք» և «Ծառուկյան» դաշինքների պատգամավորները լավագույնս կհիմնավորեն, թե ինչու Կարեն Կարապետյանը չի կարող վարչապետ լինել ապրիլից հետո: Ինչ-որ իմաստով` «Ելք» և «Ծառուկյան» դաշինքների նախաձեռնած արտահերթ նիստը Կարեն Կարապետյանի պաշտոնանկության գործընթացի խորհրդարանական մեկնարկն է:
Լուսանկարը՝ Photolure-ի