Նախորդ շաբաթ Սերժ Սարգսյանը հյուրընկալել էր Հանրային ծառայությունները կարգավորող հանձնաժողովի անդամներին և նրանց հետ հանդիպման վերջում արել մի ուշագրավ հայտարարություն՝ հորդորելով ավելի բարձր մակարդակով պաշտպանել սպառողի շահերն ու այդ հարցում բարձրացնել հանրային ներգրավվածությունը: Զուտ ֆորմալության տեսանկյունից խիստ տրամաբանական է, որ Հանրային ծառայությունները կարգավորող հանձնաժողովից պետք է ակնկալվի հենց հանրային, քաղաքացու, սպառողի շահերի բարձր մակարդակի պաշտպանություն: Առավել ևս, որ Հայաստանում այդ հանձնաժողովի գործունեության տիրույթում գտնվող ոլորտներում սպառողի շահը, մեղմ ասած, ունի պաշտպանության խիստ անհրաժեշտություն: Սակայն արդյո՞ք Սերժ Սարգսյանի այդ հորդորը պայմանավորված է զուտ ֆորմալությամբ և դրանից բխող քարոզչական էֆեկտի ակնկալիքով, թե՞ այստեղ կա նաև այլ ենթատեքստ, կամ կարող է լինել:
Իհարկե, 2018 թվականի ապրիլի խնդիրը ու նաև այդ հարցում Սերժ Սարգսյանի շարունակաբար գեներացրած անորոշությունը ինտրիգ են մտցրել պետական կառավարման համակարգի, առավել ևս՝ Սերժ Սարգսյանի գրեթե բոլոր քայլերում, սակայն այստեղ կոնկրետ տվյալ իրավիճակի մասով կա իրապես հետաքրքիր հանգամանք: Բանն այն է, որ 2018-ի ապրիլի առանցքային հարցերից մեկը Կարեն Կարապետյանի վարչապետության հնարավոր ընդհատումն է՝ անկախ նրանից, թե ով կառաջադրվի նրա փոխարեն՝ Սերժ Սարգսյանը, թե մեկ այլ թեկնածու: Ի վերջո, այստեղ հարցը միայն այն չէ, որ Սերժ Սարգսյանը կա՛մ ինքը կլինի, կա՛մ կմնա Կարապետյանը, թեև, անշուշտ, սա այսպես ասած ամենահավանական կամ-կամ-ն է:
Բոլոր դեպքերում, տվյալ պարագայում Կարեն Կարապետյանի վարչապետության շարունակության հարցում կա հետաքրքիր հանգամանք, որը հենց Հանրային ծառայությունները կարգավորող հանձնաժողովի գործունեության դաշտում է: Խոսքը գազի համակարգի, «Գազպրոմի» կամ «Գազպրոմ Արմենիայի» մասին է: Երբ Կարեն Կարապետյանը նշանակվեց վարչապետ, կարճ ժամանակ անց հանձնարարեց, այդ թվում՝ նույն հանձնաժողովին, քայլեր իրականացնել գազի գնի վերանայման՝ իջեցման ուղղությամբ: Հետո հայտարարվեց, որ գինն իջնում է թե՛ քաղաքացիների, թե՛ ձեռնարկությունների համար: Ընդ որում, այդ հանգամանքը, թերևս, առ այսօր Կարեն Կարապետյանի վարչապետական գործունեությունից հանրության համար միակ շոշափելի արդյունքն է, գոնե առայժմ: Կարապետյանը նաև հայտարարեց, որ գների նվազման հետ կապված ռիսկերը իր վրա է վերցնում «Գազպրոմը»՝ «Գազպրոմ Արմենիայի» սեփականատերը, և գնի բարձրացում չի լինի, եթե անգամ ինչ-ինչ գործոններ փոխվեն: Սակայն արդյո՞ք գնի բարձրացում չի լինի, եթե Կարեն Կարապետյանը չլինի վարչապետ:
Ակնհայտ էր, որ գնի իջեցումը «Գազպրոմի» աջակցությունն էր իր թոփ-մենեջերական շարքից դուրս եկած վարչապետին, այսպես ասած՝ մունդիրի պատվի շրջանակում: Եթե Կարեն Կարապետյանը վարչապետ չէ, ապա «Գազպրոմի» մոտիվացիան գազի ցածր գնի հարցում շոշափելիորեն նվազում է: Գնաճի ներկայիս պայմաններում ավելորդ է ասել, թե ինչպիսի խնդիրներ են առաջանում գազի գնի հնարավոր բարձրացման դեպքում: Եվ այստեղ նկատելի է դառնում այն «ներուժը», որ ունի գազի գինն ապրիլյան հանգուցալուծումների հարցում ազդեցություն թողնելու տեսանկյունից:
Ահա այդ իմաստով հետաքրքիր է դառնում ապրիլին ընդառաջ Սերժ Սարգսյանի հանձնարարությունը կամ հորդորը ՀԾԿՀ-ին՝ ավելի լավ սպասարկել սպառողի շահերն ու ավելի մեծ ներգրավվածություն ապահովել հանրության համար: Ակնառու է, որ Սերժ Սարգսյանն առնվազն պատրաստվում է այդ սցենարին՝ անհրաժեշտության դեպքում դիմադրության գործիքակազմ ունենալու համար, կամ ներկայումս ցույց է տալիս «Գազպրոմին», որ այդօրինակ պլանի գնալու դեպքում չի պատրաստվում տեղի տալ գազային հնարավոր շանտաժին: