2017 թվականի ընթացքում Վրաստանի և ԵՄ-ի միջև ապրանքաշրջանառությունը մեծացել է ավելի քան 2 տոկոսով և գերազանցել 2.844 մլն դոլարը։ Այդ ցուցանիշը կազմել է Վրաստանի ընդանուր շրջանառության մոտ 27 տոկոսը։ Այս մասին հայտարարել է առաջին փոխվարչապետ, տնտեսական և կայուն զարգացման հարցերով նախարար Դմիտրի Կումսիշվիլին, ով Վրաստանի կառավարական պատվիրակության կազմում մասնակցում է Վրաստան-ԵՄ ասոցացման խորհրդի նիստին։ Այս մասին հայտնում է «Գրուզիա Օնլայնը»՝ հղում անելով Վրաստանի էկոնոմիկայի նախարարությանը։
Կումսիշվիլիի խոսքով՝ անհրաժեշտ է նշել, որ 2017 թվականին Վրաստանից ԵՄ արտահանումն աճել է 13 տոկոսով և անվանական արտահայտմամբ կազմել 647 մլն դոլար։ Զգալիորեն աճել է արդյունաբերական արտադրանքի արտահանումը։
Նրա խոսքով՝ 2017-ի 9 ամիսների արդյունքներով ԵՄ-ի ներդրումները կազմել են 441 մլն դոլար, ինչն անցած տարվա ցուցանիշը գերազանցում է 6 տոկոսով։
«Ինչ վերաբերվում է ասոցացման և ազատ առևտրի մասին համաձանագրի շրջանակում բարեփոխումներին, մենք լիովին կատարում ենք մեր ստանձնած պարտավորությունները»,-հայտարարել է առաջին փոխվարչապետ Դմիտրի Կումսիշվիլին։