«Հըզբոլլահը» տիրապետում է զենքի, որը սպառնալիք է ներկայացնում Միջերկրական ծովում Իսրայելի տնտեսական գոտիների համար։ Այս մասին Haaretz-ին հայտնել է ռազմածովային նավատորմի բարձրաստիճան աղբյուրը։ Նա նաև նշել է, որ Իրանի ռազմական ներկայության ընդլայնումը Եմենում կարող է խորացնել այդ սպառնալիքը։
«Եմենում Իրանի դիրքերի ամրապնդումն ու ժամանակակից զենքի փոխանցումը հութիներին լուրջ տագնապ է առաջացնում»,-հայտարարել է սպան՝ հավելելով, որ դա վտանգ է ներկայացնում առևտրային նավերի համար, որոնք Ադենի ծոցով Միջերկրական ծով են ուղևորվում։ Նա նաև նշել է, որ սպառնալիքի տակ են գտնվում նաև միջերկրածովյան ջրատարածքում Իսրայելի գազային հանքավայրերը։
«Այսօր ստիպված ենք գործել սկզբունքորեն նոր իրավիճակում»,-ընդգծել է աղբյուրը։ «Լիբանանում «Հըզբոլլահը» և Եմենում հութիները ստանում են ամենաժամանակակից սպառազինությունը, որը սպառնում է և՛ մեր առևտրային նավերին, և՛ մեր գազի հանքավայրերին»,-ասել է աղբյուրը։